އޭދަފުށިން ބިންހިއްކުމަށްފަހު އެސަރަހައްދުގައި ރިވެޓްމަންޓް ޖެހުމަށް ބޮޑުހިލަ ހިފައިގެން އައި ބާޖު މިއަދު އޭދަފުށީ ބަނދަރަށް ވައްދަން އުޅެނިކޮށް ބަނދަރުގެ ނެރުމަތީގައި ބާޖު ބީހި ނެރުމަތި ބަންދުވެއްޖެއެވެ.
މިކަން ހިނގީ މިއަދު މެންދުރު 2 ޖަހާ އެހާކަން ހާއިރު ޓަގުބޯޓެއްގައި ޖަހައިގެން ބާޖު ވައްދަން އުޅެނިކޮށެވެ. ބާޖު ފަޅުތެރެއަށް ވެއްދޭތޯ ޓަގުބޯޓާ، ބަދަރުގައި އޮތް ހައިމާކެއްގެ އެހީގައި ފަހުން މަސައްކަތް ކުރި ނަމަވެސް އެކަން ކާމިޔާބުވާގޮތެއް ނުވިއެވެ.
ފަޅުތެރެއަށް ނުވެއްދިގެން ބާޖު އެންމެފަހުން 2:40 އެހާކަން ހާއިރު ވަނީ ކަނޑަށް ފުންކޮށްލާފައެވެ. ބާޖު ނެރުމަތީގައި ބަންދުވުމުގެ ސަބަބުން އެވަގުތު ފަޅަށް ވަންނަން އައި ބައެއް އުލަނދުތަކަށް ފަޅަށް ވެއްދުން ލަސްވެފައިވެއެވެ.