ދިވެހި ޒުވާނުންގެ މެދުގައި ބޮޑު މަގްބޫލުކަމެއް ހޯދާފައިވާ އަދި ރާއްޖޭގައި މިހާ ތަނަށް ބޭއްވި އެންމެ ބޮޑު ރިއަލިޓީ ޝޯ “ މޯލްޑިވިއަން އައިޑޮލް ސީޒަން 2ގެ އޮޑިޝަން އަންނަ ހޮނިހިރު ދުވަހު އޭދަފުށީގައި ފެށުމަށް ތައްޔާރުވެއްޖެއެވެ.
މިކަމާ ބެހޭ އެންމެ ފަހުގެ ތައްޔާރީތައް ނިމެމުން ދާއިރު މިހާރު އޭދަފުށީގައި ޕީއެސްއެމްގެ ޓީމެއްވެސް ދަނީ ހަރަކާތްތެރިވަމުންނެވެ.
އޭދަަފުށީ މަލްޓި ޕާޕަސް ބިލްޑިންގ ގައި ބޭއްވުމަށް ނިންމާފައިވާ ނިންމާފައިވާ މި އޮޑިޝަން ގައި ބައިވެރިވުމަށް އެސްއެމްއެސް ފޮނުވާ ފައިވާ ފަރާތްތަކުންނާއި މުބާރާތުގައި ބައިވެރިވާން ބޭނުން ކޮންމެ މީހަކަށްވެސް ފުރުސަތު އެބަ އޮތްކަމަށް ޕީއެސް އެމް އިން ބުނެއެވެ. އަދި އެކަމަށް އެދޭ މީހުން ހޮނިހިރުދުވަހުގެ 10ޖަހާއިރަށް އެތަނަށް ވަޑައިގަތުމަށް ޕީއެސްއެމް އިން ދައުވަތު އަރުވައެވެ.
ޕީއެސްއެމްގެ ޓީމުން ބުނީ އޭދަފުށީގެ އޮޑިޝަން އަށް ވެސް ފުވައްމުލަކާއި އައްޑޫގެ އިތުރުން ކުޅުދުއްފުށިން ލިބުނު ވަރުގެ ބޮޑު ތަރުހީބެއް ލިބޭނެކަމަށް އުއްމީދު ކުރައްވާކަމުގައެވެ.
މޯލްޑިވިއަން އައިޑޮލް ސީޒަން 2 ގެ ޖަޖުންނަކީ ފުރަތަމަ ސީޒަންގައި ވެސް ޖަޖުންގެ ގޮތުގައި ފެނިފައިވާ އުނޫޝާ އާއި ކުޑައިއްބެގެ އިތުރުން އަލަށް ތައާރަފްވާ އިސްމާއީލް އައްފާން އެވެ.
“މޯލްޑިވިއަން އައިޑޮލް ސީޒަން 2” ހުށައަލައިދިނުމަށް ހަމަޖައްސާފައިވަނީ ކުރީ ސީޒަން ވެސް ހުށައަޅައިދެއްވި މޫސާ ވަސީމާއި އަލަށް ތައާރަފް ކުރެވޭ މަޝްހޫރު ލަވަ ކިޔުންތެރިޔާ ލަމްހާ ލަތީފް (ލަމް) އެވެ.