އަންނަ ދިރާސީ އައު އަހަރުގައި ސްކޫލްތަކުގެ ކިޔެވުން ފެށޭނީ އަންނަ ޖަނަވަރީ މަހުގެ 17ގައި ކަމަށް އެޑިއުކޭޝަން މިނިސްޓްރީއިން އާންމުކޮށްފައިވާ 2027 ވަނަ އަަހަރުގެ އެކެޑަމިކް ކަލަންޑަރުން ދައްކައިފިއެވެ.
އެކެޑަމިކް ކަލަންޑަރުގައި ވާގޮތުން 2027 ވަނަ އަހަރުގެ ދިރާސީ އައު އަހަރު ޓީޗަރުން ސްކޫލްތަކަށް ރިޕޯޓުކުރަންޖެހެނީ ޖަނަވަރީ މަހުގެ 13 ވަނަ ދުވަހެވެ. ސްކޫލުތަކުގެ ކިޔެވުން ފެށޭނީ ޖަނަވަރީ މަހުގެ 17 ވަނަ ދުވަހަށެވެ.
ފެބުރުވަރީ މަހުގެ އަށްވަނަ ދުވަހަކީ ރޯދަމަހުގެ އެއްވަނަ ދުވަސްކަމުން އެ ދުވަސް ވަނީ ސަރުކާރު ބަންދު ދުވަހެއްގެ ގޮތުގައި ކަނޑައަޅާފައެވެ. އަދި އެ މަހުގެ 21 އިން ފެށިގެން 25 ވަނަ ދުވަހަށް ކަނޑައަޅާފައިވަނީ ޓީޗަރުންގެ ޕްރޮފެޝަނަލް ޑިވެލޮޕްމެންޓް ދުވަސްތަކުގެ ގޮތުގައެވެ.
ފެބުރުވަރީ މަހުގެ 26 ވަނަ ދުވަހުން ފެށިގެން މާޗު މަހުގެ ހަތް ވަނަ ދުވަހަކީ ރޯދަމަހުގެ ފަހު 10 އަކަށް ވުމުން އެ ދުވަސްތައް ވަނީ ސަރުކާރު ބަންދު ދުވަސްތަކެއްގެ ގޮތުގައި ކަނޑައަޅާފައެވެ. މީގެ ކުރިންވެސް ރޯދަމަހުގެ ފަހު 10 ސަރުކާރުން ބަންދުކުރެއެވެ.
ކަލަންޑަރުން ދައްކާގޮތުން މާޗު މަހުގެ ނުވަ ވަނަ ދުވަހުން ފެށިގެން 11 ވަނަ ދުވަހަށް ވަނީ ފިތުރު އީދުގެ މުނާސަބަތުގައި ސަރުކާރު ބަންދު ދުވަސްތަކެއްގެ ގޮތުގައެވެ. މެއި މަހުގެ 16 ވަނަ ދުވަހުން 20 ވަނަ ދުވަހުގެ ނިޔަލަށް ވަނީ ޙައްޖާއި އަލްޙާ އީދަށް ސަރުކާރު ބަންދުކޮށްފައެވެ.
ދަރިވަރުންގެ ފުރަތަމަ ޓާމުގެ ޓެސްޓު ފެށޭނެ ކަމަށް ކަލަންޑަރުގައި ޖަހާފައިވަނީ ޖޫން މަހުގެ 29 ވަނަ ދުވަހުން ފެށިގެން ޖުލައި މަހުގެ އަށްވަނަ ދުވަހަށެވެ. ދެވަނަ ޓާމުގެ ކިޔެވުމަށް ދަރިވަރުން ނިކުންނާނީ އޮގަސްޓު މަހުގެ އެއްވަނަ ދުވަހެވެ. އެއަށްފަހު ދެވަނަ ޓާމުގެ ޓެސްޓު ނޮވެމްބަރު މަހުގެ 23 އިން ފެށިގެން ޑިސެމްބަރު މަހުގެ ދެވަނަ ދުވަހުގެ ނިޔަލަށް ކުރިއަށްދާނެ ކަމަށް ކަލަންޑަރުގައިވެ އެވެ.
އަދި ޑިސެމްބަރު މަހުގެ ފަސްވަނަ ދުވަހު ރިޕޯޓު ފޮތް ދިނުމަށްފަހު އެ މަހުގެ 10 ވަނަ ދުވަހު ދިރާސީ އަހަރުގެ ކިޔެވުން ނިންމައި ދަރިވަރުން ޗުއްޓިއަށްދާނެ އެވެ.
މިހާރު ހިނގަމުންދާ ދިރާސާ އަހަރުގައި ދެވަނަ ޓާމުގެ ކިޔެވުން ކުރިއަށްދާއިރު، ދަރިވަރުންނަށް ޗުއްޓީ ވާނީ ޑިސެންބަރު 18އިން ފެށިގެންނެވެ.
