ދުނިޔޭގެ ނަފްސާނީ ޞިއްޙަތުގެ ދުވަހާ ގުޅުވައިގެން، އޮސްޓްރޭލިއާ މޯލްޑިވްސް ފްރެންޑްޝިޕް އެސޯސިއޭޝަން (އަމްފާ) ގެ ފަރާތުން ޚާއްޞަ ވެބިނާރެއް މިހިނގާ އޮކްޓޫބަރު މަހުގެ 1ވަނަދުވަހުގެ ރޭ ކާމިޔާބުކަމާއިކު ބާއްވައިފިއެވެ.
”މައިންޑް މެޓާސް: ވާރލްޑް މެންޓަލް ހެލްތު ޑޭ 2026“ގެ ނަމުގައި ރޭގަނޑު 8:30 އިން 10:30 އާއި ދެމެދު ބޭއްވި މި ވެބިނާރުގެ މައިގަނޑު މައުޟޫއަކީ ”ނަފްސާނީ ޞިއްޙަތުގެ ދާއިރާގައި މަސައްކަތްކުރާ ފަންނީ މާހިރުންނާއި، އެކަމުގެ ތަޖުރިބާ ލިބިފައިވާ ފަރާތްތަކުގެ ޙަޔާތުގެ ތަޖުރިބާގެ މުހިންމުކަން“ އެވެ.
މި ވެބިނާރު ފައްޓަވައިދެއްވުމުގެ ގޮތުން ދިވެހިރާއްޖެއަށް ކަނޑައަޅާފައި ހުންނަވާ އޮސްޓްރޭލިއާގެ ހައި ކޮމިޝަނަރ، ހިސް އެކްސެލެންސީ ޑޭވިޑް ޖެސަޕްގެ ރެކޯޑްކުރެވިފައިވާ ބަޔާނެއް އިއްވުނެވެ. އެ ބަޔާނުގައި ނަފްސާނީ ޞިއްޙަތުގެ ދާއިރާގައި މަސައްކަތް ކުރައްވާ ފަރާތްތަކުގެ އަގު ފާހަގަކުރައްވާ އަދި އަމްފާގެ މަސައްކަތްތަކަށް ތަޢުރީފު ކުރެއްވވާފައިވެއެވެ.
މި ވެބިނާރުގައި މޮޑަރޭޓަރެއްގެ ގޮތުން ޙަރަކާތްތެރިވެވަޑައިގަތީ ދިވެހިރާއްޖޭގެ ޤައުމީ ޔުނިވަރސިޓީގެ ބިހޭވިއަރަލް ސައިންސް ޑިޕާޓްމަންޓްގެ ސީނިއަރ ލެކްޗަރަރ އަލްފާޟިލާ ފާޠިމަތު ނަޙުލާއެވެ. އަދި ޕެނަލިސްޓުންގެ ގޮތުގައި ބައިވެރިވެވަޑައިގަތީ ދިވެހިރާއްޖޭގެ ޤައުމީ ޔުނިވަރސިޓީގެ ފެކަލްޓީ އޮފް ހެލްތު ސައިންސްގެ ޑީން ޑރ. ޢާއިޝަތު ޝާނޫރާއި، ޤައުމީ ނަފްސާނީ ޞިއްޙަތުގެ މަރުކަޒުގެ ލީޑް ސޯޝަލް ވޯކަރ އަލްފާޟިލާ ފާޠިމަތު ސޯފިޔާ ރަޝީދުގެ އިތުރުން، އެ މަރުކަޒުގެ ސީނިއަރ ކޮންސަލްޓަންޓް ސައިކޭޓްރިސްޓް ޑރ. ޢާރިފް މުޙައްމަދެވެ.
ވެބިނާރުގައި ވާހަކަފުޅު ދައްކަވަމުން ޑރ. ޢާރިފް މުޙައްމަދު ފާހަގަކުރެއްވި ގޮތުގައި، ބަލީގެ ފަރުވާއާއި ފަރުވާއާއިގުޅޭ ނިންމުންތަކުގައި، ބަލިމީހުންނާއި އެމީހުން ބަލަހައްޓާ ފަރާތްތަކުގެ ބައިވެރިވުމަކީ ނުހަނު ބޭނުންތެރި އަދި މުހިންމުކަމެކެވެ. އަދި އެއާއެކު، ޚިދުމަތްތައް ތަރައްޤީ ކުރުމާއި، ބަލިތަކުން ރައްކާތެރިވުމާއި ހޭލުންތެރިކަން އިތުރު ކުރުމުގެ މަސައްކަތްތަކުގެ އިތުރުން ނިޒާމުތައް ބިނާކުރުމުގައިވެސް އެ ފަރާތްތަކުގެ ބައިވެރިވުމާއި ތަޖުރިބާ ހިމެނުމަކީވެސް ވަރަށް މުހިންމުކަމެއް ކަމަށް ޑރ. ޢާރިފު ވިދާޅުވިއެވެ
ވެބިނަރގެ ޕެނަލިސްޓް އަދި ސޯޝަލް ވޯކަރ އަލްފާޟިލާ ފާޠިމަތު ސޯފިޔާ ރަޝީދު ދެއްކެވި ވާހަކަފުޅުގައި، ނަފްސާނީ ދައްޗަކާ ނުވަތަ ބައްޔަކާ ކުރިމަތިލާ ވަގުތު އިންސާނާގެ ދިރިއުޅުގެ އެކިއެކި ކަންކަމަށް ނުފޫޒު ފޯރުވެގެން ދާކަން ފާހަގަކުރެއްވިއެވެ. މި ނުފޫޒަކީ މީހާގެ ކެތްތެރިކަން (ރެޒިލިއަންސް) އިތުރުކޮށްދޭ ނުވަތަ ހާސްކަން ބޮޑުކުރުވާ ކަންކަމަށް ވެދާނެކަމަށްވެސް ފާހަގަކުރެއް ވިއެވެ. އެހެންކަމުން، ނަފްސާނީ ގޮތުން ދަތިތަކާ ކުރިމަތިލާ ފަރާތްތަކުގެ ދިރިއުޅުން ރަނގަޅުކުރުމަށް ވިސްނާނަމަ، ފަރުދީ ފެންވަރުގައާއި، މުޖުތަމަޢުގެ ފެންވަރުގައާއި، އަދި ސިޔާސީ ނުވަތަ ޤައުމީ ފެންވަރުގައި ފިޔަވަޅުތައް އަޅަން ޖެހެއެވެ. އަދި އެފަދަ ފަރާތްތަކަށް ޚާއްޞަކޮށްގެން ޕްރޮގްރާމްތަކާއި ފަރުވާގެ ނިޒާމުތައް ފަރުމާކުރާއިރު، އެމީހުންގެ އަޑާއި ތަޖުރިބާތައް ހިމެނައިގެން އެކަންކަން ކުރުމަކީ މުހިންމު ކަމެއްކަމަށް އޭނާ ބާރުއެޅުއްވިއެވެ.
ދުނިޔޭގެ ނަފްސާނީ ޞިއްޙަތުގެ ދުވަސް ފާހަގަ ކުރުމުގެ ގޮތުން އަމްފާއިން ވަނީ މިދިޔަ އަހަރުވެސް ވެބިނަރއެއް ބާއްވާފައެވެ. މި އަހަރުގެ ދުނިޔޭގެ ނަފްސާނީ ޞިއްޙަތުގެ ދުވަސް ފާހަގަ ކުރުމުގެ ގޮތުން އެންމެ ފުރަތަމަ ހަރަކާތެއް މި ބޭއްވީ އަމްފާއިންނެވެ.
