ސަރުކާރުގެ ޚަރަދުތައް ހަމަޖެއްސުމަށް ރުފިޔާ ޗާޕުކުރުން މި ސަރުކާރުގެ ސަގާފަތަކަށް ހަދައިފި ކަމަށް ކުރީގެ އެޑިއުކޭޝަން މިނިސްޓްރީގެ ސްޓޭޓް މިނިސްޓަރ ޑރ. ޢަބްދުﷲ ނަޒީރު ވިދާޅުވެއްޖެއެވެ.
ޑރ.ނަޒީރު މިހެން ވިދާޅުވެފައިވަނީ ޕީޕީއެމް/ ޕީއެންސީގެ “ދަރުބާރު ޖަގަހަ” ހުޅުވުމަށް ރޭ ބޭއްވި ހަފްލާގައި ވާހަކަ ދައްކަވަމުންނެވެ.
ޑރ. ނަޒީރުގެ ވާހަކަ ކުރިއަށް ގެންދަވަމުން ވިދާޅުވީ ، ފަތުރުވެރިންނާއި، ލިޔުންތެރިން ރާއްޖޭގެ ރައްޔިތުން ސިފަ ކުރައްވަނީ ފުދިގެން އަމިއްލަ ވަންތަ ދިރިއުޅުމެއް އުޅޭ ރީތި ގައުމެއްގެ ގޮތުގެ ގޮތުގައިކަމަށެވެ. އެކަމަކު މިހާރު ބައިނަލްއަގުވާމީ މާލީ އިދާރާތަކުން މިހާރު ރާއްޖެ ސިފަ ކުރައްވަނީ އިންތިހާއަށް ދަރަނި ވެރިވެފައިވާ ދައުލަތެއްގެ ގަޮތުގައި ކަމަށެވެ. އަދި ބޭރުގެ ނުފޫޒު މި ގައުމުގެ މައްޗައް އޮތް އޮތުން އެއީ ހަގީގަތެއް ކަމަށާއި، އިގްތިސާދީ ހަރަކާތްތައް އެއްކޮށް ހުއްޓި، ދައުލަތުގެ ރިކަރަންޓު ޚަރަދު ހަމަ ޖެއްސުމަށްޓަކައި ރުފިޔާ ޗާޕު ކުރުން ސަގާފަތަކަށް ހަދާފައިވާ ކަމަށް ނަޒީރު ވިދާޅުވިއެވެ.
”ރަށްރަށުގެ ބޮޑެތި އުޅަނދުތައް ފަޅު ތެރޭ ތާށިވެއްޖެ، މަސްވެރިކަމުގެ ސިނާއަތު މިހާރު ވަނީ ހުއްޓިފައި، ސިއްހީ ދާއިރާ ތަރައްގީ، ބޭރުގެ ގައުމުތަކަށް ބަލި މީހުން ގެންދިއުން ހުއްޓުމަށްޓަކައި ރައީސް ޔާމީން ފެއްޓެވި ހެލްތް ސެކްޓާގެ ތަރައްގީގެ މަސައްކަތުގެ ތެރެއިން، ސްޓޭޓް އޮފް ދަ އާޓް ޓެކްނޮލޮޖީގެ މެޑިކަލް ވަސީލަތްތައް ބޭނުން ނުކޮށް ގަސްތުގައި ބަހައްޓާ، އާސަންދަ ބޮޑެތި ބަޖެޓުތައް އަހަރުގެ ކުރީކޮޅާއި ހަމައަށް ހުސްވާ ވަރަށް ރާއްޖެއިން ބޭރަށް ބަލި މީހުން ފޮނުވާކަން އެއީ އެންމެން ދަންނަކަމެއް”. ނަޒީރު ވިދާޅުވިއެވެ.
2017 ވަނަ އަހަރު ފަސް މާއްދާއިން ފާސް ވި ކުދިން ގެ އިންސައްތަ ވަނީ %80 އިން %50 އަށް މި ސަރުކާރުގައި ދަށްވެފައިމަށް ވެސް އޭނާ ވިދާޅުވިއެވެ. އަދި ގައުމީ މަައްސަލަތައް ހައްލު ކުރުމަށްޓަކައި، ޕީޕީއެމް/ ޕީއެންސީއިން ނިކުމެ ހުންނެވި ތައުލީމީ، ގާބިލް އަދި މަސައްކަތުގެ ތަޖުރިބާއިން ނަތީޖާ ނެރެދެއްވި ކެންޑިޑޭޓު ޑރ. މުހައްމަދު މުއިއްޒު ހޮވުމަށް ރައްޔިތުން ކިބައިން އޭނާ އެދިވަޑައިގެންނެވިއެވެ.
