ޖާގައިގެ ދަތިކަން ކުރިމަތިވެފައިވާ ބ.އަތޮޅު ތައުލީމީ މަރުކަޒުގައ4 ބުރީގެ އިމާރާތެއް އެޅުމަށް މާރިސް ކޮންސްޓްރަކްޝަންއާ މިއަދު ހަވާލުކޮށްފިއެވެ.
މަސައްކަތް ހަވާލުކުރުމަށް މިއަދު މިނިސްޓްރީ އޮފް އެޑިއުކޭޝަންގައި އޮތް ރަސްމިއްޔާތުގައި އެޑިއުކޭޝަން މިނިސްޓްރީގެ ފަރާތުން ސޮއިކުރެއްވީ އެމިނިސްޓްރީގެ ސްޓޭޓް މިނިސްޓަރ އަހްމަދު ޝަފީއު އެވެ.
މިރަސްމިއްޔާތުގައި ވާހަކަ ދައްކަވަމުން ޝަފީއު ވިދާޅުވީ މި ޕްރޮޖެކްޓަކީ ވޯލްޑްބޭންކާއި ދިވެހިސަރުކާރާއި ގުޅިގެން ހިންގާ “އެންހޭންސް އެޑިއުކޭޝަން ޑިވެލޮޕްމަންޓް ޕްރޮޖެކްޓް” ގެ ދަށުން އިމާރާތްކުރެވޭ ތަނެއްކަމުގައެވެ. އިމާރާތް ނިމޭއިރު މި ތަނުގައި 12 ކްލާސްރޫމް އިތުރުވާނެކަމަށާއި އޭދަފުށީގައި މިފަދަ އިމާރާތެއް އެޅުމުގެ އެންމެ މުހިންމު ބޭނުމަކީ އެސްކޫލަކީ ރަށުން ބޭރުން ގިނަ ކުދިން ތަކެއް ކިޔަވަން އަންނަ ސްކޫލަކަށް ވާތީ ސްކޫލްގެ ޖާގައިގެ ދަތިކަން ހައްލު ކުރުމުގެ ގޮތުން ކަމުގައެވެ.
9.3މިލިއަންރުފިޔާއަށް ހަވާލުކުރި މިމަސައްކަތް 21ދުވަހުގެ ތެރޭގައި ފެށޭވަރުވާނެކަމަށާއި އުންމީދު ކުރެވެނީ މިއަހަރުނިމި އަންނަ 2017ވަނައަހަރުގެ ކިޔެވުން ފެށެން ވާއިރަށް މި ކްލާސްތަކުގެ މަސައްކަތް މުޅިން ނިންމާލެވޭވަރު ވާނެކަމުގައި ޝަފީއުވިދާޅުވިއެވެ.
