ދިރާސީ އާ އަހަރުގެ ކިޔެވުން ފެށުނު އިރުވެސް ދަރިވަރުންނަށް ހަމަކޮށް ނުދެވުނު ޓެކްސްޓް ފޮތްތައް މިހާރު ލިބިފައިވާ ކަމަށާ ސްކޫލްތަކަށް ފޮނުވުމުގެ މަސައްކަތް ކުރަމުންދާ ކަމަށް އެޑިއުކޭޝަން މިނިސްޓްރީން ބުނެފި އެވެ.
ދިރާސީ އާ އަހަރު ފެށުނުއިރު ދަރިވަރުންގެ ޓެކްސްޓް ފޮތްތައް ހަމަވެފައިނުވާތީ، ބެލެނިވެރިން ދިޔައީ ކަންބޮޑުވުން ފާޅުކުރަމުންނެވެ.
ދަރިވަރުން ބޭނުންވާ ޓެކްސްޓް ފޮތްތަކަކީ ރާއްޖެއިން ބޭރުން ގެންނަ ފޮތްތަކަކަށް ވެފައި، ކޮވިޑް-19 ގެ ސަބަބުން އެކަމުގެ ދަތިތަކެއް ހުރިކަމަށް މީގެ ކުރިން އެޑިއުކޭޝަން މިނިސްޓްރީން ވަނީ ބުނެފައެވެ. އެޑިއުކޭޝަން މިނިސްޓްރީން އޭރު ބުނީ މި މަސް ނިމުމުގެ ކުރިން ފޮތްތައް ހަވާލުކުރެވޭނެ ކަމަށެވެ.
އިއްޔެ އެޑިއުކޭޝަން މިނިސްޓްރީން ކުރި ޓުވީޓެއްގައި ބުނެފައިވަނީ މިހާތަނަށް ދަރިވަރުންނަށް ހާޑްކޮޕީ ލިބިފައިނުވާ ފޮތްތައް މިހާރު މިނިސްޓްރީއަށް ލިބިފައިވާ ކަމަށެވެ. އަދި މި ފޮތްތައް ސްކޫލްތަކަށް ފޯރުކޮށްދިނުމުގެ މަސައްކަތް މިހާރު ފަށާފައިވާ ކަމަށްވެސް އެ މިނިސްޓްރީން ބުނެ އެވެ.
މިހާތަނަށް ދަރިވަރުންނަށް ހާޑްކޮޕީ ލިބިފައިނުވާ ފޮތްތައް މިހާރު ވަނީ މިނިސްޓްރީއަށް ލިބިފައި. އަދި މި ފޮތްތައް ސްކޫލްތަކަށް ފޯރުކޮށްދިނުމުގެ މަސައްކަތް މިހާރުވަނީ ފަށާފައި. pic.twitter.com/wqOGnA4fT1
— Ministry of Education (@MoEdumv) August 20, 2021
ފޮތްތައް ހަމަނުވުމުގެ އިތުރުން ދިރާސީ އާ އަހަރު ފެށުނުއިރު، ބައެއް ސްކޫލްތަކުގައި ޓީޗަރުން ހަމަނުވާ ކަމުގެ ކަންބޮޑުވުންވެސް ބެލެނިވެރިންވަނީ ފާޅުކޮށްފައެވެ.