ސައުދީ އަރަބިއްޔާގެ ރަސްގެފާނުގެ ހެޔޮ އެދުންތަކާ އެކު މިއަހަރުގެ ރޯދަމަހަށް ރާއްޖެއަށް ދޭން ނިންމި 50 ޓަނުގެ ކަދުރު މިއަދު ހަވާލުކޮށްފިއެވެ.
ދިވެހި ސަރުކާރުގެ ފަރާތުން މި ކަދުރުތަކާ ހަވާލުވެލެއްވީ ރާއްޖޭގައި ހުންނަ ސައުދީ އަރަބިއްޔާގެ އެމްބަސީގައި މިއަދު އޮތް ރަސްމިއްޔާތެއްގައި، އިސްލާމިކް މިނިސްޓަރު ޑރ. އަހުމަދު ޒިޔާދު ބާގިރެވެ.
ކޮންމެ އަހަރެއްގެ ރޯދަ މަހާއި ދިމާކޮށް ސައުދީން ރާއްޖެ އަށް ކަދުރު ހަދިޔާކުރެއެެވެ. އަދި އެކަދުރު ރާއްޖޭގެ ރައްޔިތުންނަށް ސަރުކާރުން ބަހަމުން ގެންދެއެވެ. އެހެންނަމަވެސް މިއަހަރު ރޯދަމަސް ނިމުނު އިރުވެސް ސައޫދީ ރަސްގެފާނު ދިވެހިންނަށް ހަދިޔާ ކުރި ކަދުރު ނުލިބޭތީ ގިނަބަޔަކު ދިޔައީ އެވާހަކަ ދައްކަމުންނެވެ.
މިއަދު މި ލިބުނު 50 ޓަނުގެ ކަދުރު އާންމުންނަށް ބަހާނެ އުސޫލުތައް މިހަފްތާގެ ތެރޭގައި އާއްމުކުރާނެކަމަށް އިސްލާމިކް މިނިސްޓްރީން ބުނެއެވެ.
