އިއްޔެ އޭދަފުއްޓަށް ކުރި ވިއްސާރައިގައި ވެހުނު ވާރޭއަކީ އެސިޑްވާރޭއެއްކަމަށް ލަފާކުރެވޭތީ، އެފެން ބޭނުން ނުކުރުމަށް އޭދަފުށީ ކައުންސިލުން ރައްޔިތުންނަށް އަންގައިފިއެވެ.
މިއަދު ހެނދުނު އޭދަފުށީ ކައުންސިލުން މިކަން ރައްޔިތުންނަށް އެންގީ އޭދަފުށީ ކައުންސިލްގެ މެގަފޯނުން ރަށުތެރެއަށް އެންގި އެންގުމެއްގައެވެ. އެއެންގުމުގައި ގޮވާފައިވަނީ އިއްޔެ ވެހުނު ވާރޭއަކީ އެސިޑް ހިމެނޭ ވާރޭއެއްކަމަށް ލަފާކުރެވޭކަމަށް ބ. އަތޮޅު ހޮސްޕިޓަލުން މައުލޫމާތުދޭ ކަމަށާ، އެފެން ބޭނުންނުކުރުމަށް އެދޭކަމަށެވެ.
އިއްޔެ އޭދަފުއްޓަށް ވެހުނު ވާރޭފެން ނެގި ގިނަގޭގޭގެ ތާނގީތަކަށް އެޅިފައިވަނީ ކަޅުފެންވައްތަރަކަށް ހުންނަފެނެއްކަމަށް ބެލެވޭތީ، އެފެންތައް ބައެއްގޭގެއިން ވަނީ އުކާލާފައެވެ.
ހުޅަނގުމުސުމާގުޅިގެން އޭދަފުއްޓަށް މިދިޔަ ދެދުވަހުވެސް އަދި މިއަދުވެސްދަނީ ދޭތެރެދޭތެރެއިން ބޯކޮށް ވާރޭވެހި، ވައިގަދަވަމުންނެވެ. ކަޅުވާރޭފެން އެޅިގެން މީގެ 2 އަހަރެއްހާދުވަސްކުރިންވެސް އޭދަފުށީގެ ބައެއްގޭގޭގެ ތާނގީތަކުން ފެންހުސްކުރިއެވެ.