ބ. ހިތާދޫ އައިލެންޑް ޑިވެލޮޕްމަންޓް އެސޯސިއޭޝަން ( ހިދާ ޖަމިއްޔާ )އިން އެރަށުގައި ތަރައްގީ ކުރި ކުދަކުދިންގެ ޕާކު ހުޅުވައިފިއެވެ. އިއްޔެ ހަވީރު އެ ސަރަހައްދުގައި ބޭއްވި ހަފްލާއެއްގައި ޕާކް ހުޅުވައިދެއްވީ ޖަމިއްޔާގެ ރައީސް އަބްދުއްރަޝީދުއާއި ނާއިބު ރައީސެވެ.
މި ރަސްމިއްޔާތުގައި ރައީސް އަބްދުއްރަޝީދު ވިދާޅުވީ ކުޑަކުދިންގެ ޕާކެއް ތަރައްޤީ ކުރަންޖެހުނީ މިއީ ރަށުގެ ކުޑަކުދިންނަށް މިހާރުން މިހާރަށްވެސް ބޭނުންވެފައިވާ ޚިދުމަތެއްކަމަށް ދެކިގެން ކަމަށާ، މިކަމުގައި ވަރަށް ގިނަ ބައެއްގެ އެހީތެރިކަން ލިބުނު ކަމަށެވެ.
ރައިސް ރަޝީދު އިތުރަށް ވިދާޅުވީ ހަތަރު މަސްދުވަހުން މަސައްކަތް ނިންމާ ޕާކް ހުޅުވުނު އިރު މުޅި ޕްރޮޖެކްޓަށް ހަތަރު ލައްކައަށް ވުރެ ގިނަ ރުފިޔާ ހޭދަކުރެވިފައިވާ ކަމުގައެވެ.
“ޚާއްސަ ގޮތެއްގައި މިދާއިރާގެ މެމްބަރު މިކަމަށް ވަރަށްބޮޑު އެހީއެއް ދެއްވި. އަދި ހިތްވަރުވެސް ދެއްވި. އޭގެ އިތުރުން ކައުންސިލާއި، އާންމު ރައްޔިތުންގެ ބައިވެރިވުންވެސް ވަރަށްބޮޑު”
2008 ވަނަ އަހަރު އުފެދުނު ހިތާދޫ ހިދާ ޖަމްއިއްޔާއަކީ އެރަށުގެ ތަރައްޤީއަށް ކުރެވޭ މަސައްކަތް ތަކުގައި މިހާރަކަށް އައިސް ވަރަށް ބޮޑަށް ފާހަގަކުރެވޭ ޖަމްއިއްޔާއެކެވެ. ހިދާ ޖަމިއްޔާގެ އިތުރުން އެރަށުގައި ޔޫތު ވިންގްގެ ނަމުގައިވެސް ޖަމްއިއްޔާއެއް އޮވެއެވެ.
