ބ.އޭދަފުށީ ކޯޓުން 2014ވަނަ އަހަރު އޭދަފުށީ މުޝްތަރީގޭ ފަތުހުﷲ ، ކުޑަކުއްޖަކާމެދު ޖިންސީ އަމަލެއް ހިންގައިފިކަން ސާބިތުވެއްޖެކަމަށް ކަނޑައަޅުއްވައި 14 އަހަރަށް ޖަލަށް ލުމަށް ކޮށްފައިވާ ހުކުމް ހައިކޯޓުން ބާތިލް ކޮށްފިއެވެ.
މި މައްސަލަ ހައިކޯޓުގައި އިސްތިއުނާފު ކުރުމުން ، މައްސަލަ ބެއްލެވުމަށް ފަހު ތިން ފަނޑިޔާރުންގެ އިއްތިފާގުން މި ހުކުމް ބާތިލުކަމަށް ކަނޑައެޅި ހުކުމްގައިވަނީ ” އޭދަފުށީ ކޯޓުން އޭދަފުށީ މުޝްތަރީގޭ ފަތުހުﷲ އަބްދުﷲގެ މައްޗަށް ކުޑަކުއްޖަކާމެދު ޖިންސީ އަމަލެއް ހިންގައިފިކަން ޝަރީއަތަށް ސާބިތުވެއްޖެކަމަށް ކަނޑައަޅުއްވައި ، އެކުށުގެ އުގޫބާތެއްގެ ގޮތުން ، ފަތުހުﷲ 14 އަހަރަށް ޖަލަށްލުމަށް ހުކުމް ކުރައްވާފައިވަނީ ޝަރުއީ އަދި ގާނޫނީ އުސޫލުތަކާ ޚިލާފަށް ކަމަށް މި ޤަޟިއްޔާ ބެލި ދިވެހިރާއްޖޭގެ ހައިކޯޓުގެ ތިން ފަނޑިޔާރުންނަށް އިއްތިފާގު ވެވިފައިވާތީ އެގަޟިއްޔާގައި ކުރައްވާފައިވާ ހުކުމް ބާތިލުކޮށް އެގޮތުގެ މަތީން ހުކުމްކޮށްފި ” ކަމުގައެވެ.
އޭދަފުށީ ކޯޓުން ފަތުހުﷲ 14އަހަރަށް ޖަލަށް ލުމަށް ހުކުމްހުރުމާއި ގުޅިގެން އިއްޔެއާހަމައަށް އޭނާ ގެންދިޔައީ ހުކުމް ތަންފީޒު ކުރުމުގެ ގޮތުން ޖަލުގައި ދުވަސްތައް ހޭދަކުރަމުންނެވެ.
