ބ.ކުޑަރިކިލާއި ދޮންފަނުގައި ލެބޯޓަރީ އިމާރާތްކޮށްދޭނެ ބަޔަކު ހޯދުމަށް ސިއްހަތާ ބެހޭ ވުޒާރާއިން އިއުލާނު ކޮށްފިއެވެ.
ރާއްޖޭގެ އެކި ކަންކޮޅުތަކުގައި ސިއްހީ ޚިދުމަތް ފުޅާކުރުމަށް ސަރުކާރުން ކުރަމުންދާ މަސައްކަތުގެ ދަށުން، ކުޑަރިކިލާއި ދޮންފަނު ހިމެނޭގޮތަށް ސިއްހީ މަރުކަޒު ގާއިމުކޮށްފައިވާ 15 ރަށެއްގައި ލެބޯޓަރީ އިމާރާތްކޮށްދޭނެ ބަޔަކު ހޯދުމަށް ވަނީ އިއުލާނު ކޮށްފައެވެ.
އެ ވުޒާރާއިން މިދިޔަ އާދިއްތަ ދުވަހު ވަކި ވަކިން ކުރި އިއުލާނު ގައިވާ ގޮތުން، މި މަސައްކަތަކީ ރަށްރަށުގެ ސިއްހީ ނިޒާމު ހަރުދަނާކޮށް، ރައްޔިތުންނަށް ފަސޭހައިން ޓެސްޓުތައް ހެދޭނެ އިންތިޒާމު ހަމަޖެއްސުމަށް ފަށާފައިވާ ބޮޑު މަޝްރޫއެއްގެ މުހިންމު އެއް ބައެވެ. މި މަޝްރޫއުގެ ސަބަބުން، ބަލިތައް ދެނެގަތުމަށް ރައްޔިތުން އެހެން ރަށްރަށަށް ކުރަންޖެހޭ ދަތުރުތައް ނިމުމަކަށް އަންނާނެ ކަމަށް ސިއްހަތާ ބެހޭ ވުޒާރާއިން ފާހަގަކުރެއެވެ.
މި 15 ރަށުގައި ލެބޯޓަރީ ގާއިމުކުރުމުގެ މަސައްކަތަކީ، ރާއްޖޭގައި ލެބޯޓަރީގެ ޚިދުމަތް ނެތް 76 ރަށެއްގައި އެ ޚިދުމަތް ފެށުމަށް ސަރުކާރުން އަމާޒުހިފައިގެން ކުރިއަށްގެންދާ ޚާއްސަ މަޝްރޫއުގެ ތެރެއިން ކުރިއަށްދާ މަސައްކަތެކެވެ. ރައީސުލްޖުމްހޫރިއްޔާ ޑރ. މުހައްމަދު މުއިއްޒު މިއަހަރުގެ ރިޔާސީ ބަޔާނުގައި ވިދާޅުވެފައިވާ ގޮތުގައި، މި އަހަރުގެ ނިޔަލަށް އެ 76 ރަށުގައި ލެބޯޓަރީ ގާއިމުކޮށް ނިންމުމަކީ ސަރުކާރުގެ އެންމެ ބޮޑު އެއް އަމާޒެވެ.
ސިއްހީ ދާއިރާގެ އުމްރާނީ ތަރައްގީއަށް އިސްކަންދީގެން ކުރިއަށްގެންދާ މި މަޝްރޫއުގެ ދަށުން، މި އަހަރުގެ ފެބްރުއަރީ މަހުގެ ނިޔަލަށް 11 ރަށެއްގައި ލެބޯޓަރީ ގާއިމުކޮށް ޚިދުމަތް ދޭން ފަށާފައިވާ ކަމަށް ދައުލަތުގެ މީޑިއާއިން ރިޕޯޓުކޮށްފައިވެއެވެ. މިއީ ދުޅަހެޔޮ ޖީލެއް ބިނާކުރުމަށާއި، އަސާސީ ސިއްހީ ހިދުމަތްތައް ރައްޔިތުންނާ ގާތުން ފޯރުކޮށްދިނުމަށް އެޅޭ ވަރަށް މުހިންމު ފިޔަވަޅެއް ކަމަށް ސަރުކާރުން ދެކެއެވެ. މީގެ ކުރިން ބައެއް ރަށްރަށުގައި އާދައިގެ ޓެސްޓެއް ހެދުމަށްވެސް ކަނޑުމަގުން ބޮޑު ހޭދައެއް ކޮށްފައި އެހެން ރަށްރަށަށް ދާންޖެހުމަކީ އާންމުންގެ ވަރަށް ބޮޑު ކަންބޮޑުވުމެކެވެ. ނަމަވެސް މި މަޝްރޫއު ނިމުމުން އެކަމަށް ދާއިމީ ހައްލެއް ލިބިގެންދާނެއެވެ.
އާ ލެބޯޓަރީތައް އިމާރާތްކުރުމުގެ އިތުރުން، ރަށްރަށުގެ ސިއްހީ މަރުކަޒުތަކުގައި ހުރި މެޝިނަރީތަކާއި އާލާތްތައް އާކުރުމުގެ ބޮޑު މަސައްކަތެއްވެސް ސަރުކާރުން ވަނީ ފަށާފައެވެ. އެގޮތުން، އެތައް އަހަރެއް ވަންދެން ނުބަލަހައްޓައި ހުރުމުގެ ސަބަބުން ހަލާކުވެ، ހިދުމަތް ދިނުން ހުއްޓިފައިވާ މެޝިނަރީތަކާއި އިކްއިޕްމަންޓްތައް ބަދަލުކުރުމުގެ މުހިންމު މަޝްރޫއެއް މިހާރު ވަނީ ސްޓޭޓް ޓްރޭޑިން އޯގަނައިޒޭޝަން (އެސްޓީއޯ) އާ ހަވާލުކޮށްފައެވެ. މި މަސައްކަތުގެ ދަށުން، ޒަމާނީ ފެންވަރުގެ އާލާތްތައް ސިއްހީ މަރުކަޒުތަކަށް ފޯރުކޮށްދީ، މެދުކެނޑުމެއްނެތި ޚިދުމަތް ލިބޭނެ އިންތިޒާމު ހަމަޖެހިގެންދާނެއެވެ. މީގެ ކުރިން ބައެއް ރަށްރަށުގެ ސިއްހީ މަރުކަޒުތަކުގައި މެޝިންތައް ހަލާކުވެ، މަރާމާތު ނުކުރެވި ގިނަ ދުވަސްވުމުގެ ސަބަބުން ބަލިމީހުންނަށް ފަރުވާ ދިނުމުގައި ޑޮކްޓަރުންނާއި ނަރުހުންނަށް ވަނީ ބޮޑެތި ގޮންޖެހުންތަކާ ކުރިމަތިލާން ޖެހިފައެވެ. އެހެންކަމުން، އެސްޓީއޯ މެދުވެރިކޮށް މި ތަކެތި އާކުރުމަކީ ރަށްރަށުގައި ތިބެގެން ފެންވަރު ރަނގަޅު ސިއްހީ ފަރުވާ ހޯދުމަށް ރައްޔިތުންނަށް އޮތް ވަރަށް ބޮޑު ހުރަހަކަށް ހައްލު ލިބިގެންދާނެ ކަމެއް ކަމަށް ބެލެވެއެވެ.
ފަނަރަ ރަށުގައި ލެބޯޓަރީ އިމާރާތްކުރުމުގެ މަސައްކަތަށް ޝައުގުވެރިވާ ފަރާތްތަކަށް ބީލަން ހުށަހެޅުމުގެ ފުރުސަތު މިހާރު ވަނީ ހުޅުވާލާފައެވެ. ސިއްހަތާ ބެހޭ ވުޒާރާއިން ބުނި ގޮތުގައި، މި މަސައްކަތްކުރުމަށް ޝައުގުވެރިވާ ފަރާތްތަކުން އަންނަ މަހުގެ އަށްވަނަ ދުވަހުގެ މެންދުރުފަހު 1:00 ގެ ކުރިން ރަޖިސްޓްރޭޝަން ފުރިހަމަކުރުމަށްފަހު އީމެއިލް ކުރަން ޖެހޭނެއެވެ. އަދި މި މަޝްރޫއާ ގުޅޭގޮތުން އިތުރު މައުލޫމާތު ސާފުކުރަން ބޭނުންވާނަމަ، އަންނަ މަހުގެ 10 ވަނަ ދުވަހުގެ ކުރިން ވުޒާރާގެ ރަސްމީ އީމެއިލް [email protected] އަށް މެއިލްކުރުމަށް ވަނީ އެދިފައެވެ.
