ދައުލަތުގެ އިސް މަގާމުތައް އަދާކުރި ވެރިންގެ އިތުރުން ނުހައްގު މުއްސަނދިކަން ހޯދާފައިވާ އެންމެންގެ މައްސަލަ ބެލޭގޮތަށް، އަދި އެ ހުރިހާ ފަރާތްތަކަށް ފަސޭހައިން ދައުވާކުރެވޭ ގޮތަށް ގާނޫނު އިސްލާހުކުރުމަށް ރައްޔިތުންގެ މަޖިލީހުގައި ސަރުކާރު ތަމުސީލުކުރާ މެންބަރުން މިއަދު ގޮވާލައިފިއެވެ.
އެ ބިލުގެ އިބުތިދާއީ ބަހުސްގައި ވާހަކަދައްކަވަމުން އޭދަފުށީ ދާއިރާގެ ޕީއެންސީ މެންބަރު އަހުމަދު ސަލީމް މިއަދުގެ ޖަލްސާގައި ވިދާޅުވީ، ރައްޔިތުންގެ މަޖިލީހުގެ މުޅި މެންބަރުންނަށް މިއިން އެއްވެސް ކަމެއް ނިސްބަތްކޮށްގެން ނުވާނެ ކަމަށެވެ. އެއީ، މެންބަރަކަށް ވުމުގެ ކުރިން ވެސް އަމިއްލަ ވިޔަފާރި ހިންގާ ފަރާތްތައް އެކި ދައުރުތަކުގައި މެންބަރުކަން ކުރައްވާފައިވާ ކަމަށް ސަލީމް ވިދާޅުވިއެވެ.
ހަމައެއާ އެކު ރައްޔިތުންގެ މަޖިލީހުގައި ތިބޭ މެންބަރުންނަކީ އެއްވެސް ތަނެއްގެ ތިޖޫރިއާ ހަވާލުވެގެން ތިބޭ ބައެއް ނޫން ކަމަށާއި އެއްވެސް ކުންފުންޏެއްގެ ވެރިއެއްގެ ހައިސިއްޔަތުން ބާރެއް ފޯރުވޭ ބައެއް ނޫން ކަމަށް ސަލީމް ވިދާޅުވިއެވެ. ނަމަވެސް، މެންބަރުންގެ ތެރޭގައި ވެސް ނުހައްގުން މުއްސަނދިކަން ހޯދާފައި ތިބޭ މީހުން ތިއްބަވާނެ ކަމަށް ސަލީމް ވިދާޅުވިއެވެ.
ދައުލަތުގެ މަގާމަކުން ވަކިވާ ފަހުން ވެސް، އެ މަގާމެއްގައި ހުރެ ހޯދާފައިވާ ނުހައްގު މުއްސަނދިކަމަށް ފަސޭހައިން ދައުވާކުރެވޭ ގޮތަށް ގާނޫނުލް އުގޫބާތަށް އިސްލާހެއް ގެންނަން ހުށެހެޅުއްވީ މާފުށި ދާއިރާގެ މެންބަރު ހުސައިން ރިޒާ އާދަމެވެ.
މާފުށި ދާއިރާގެ މެންބަރު ހުސައިން ރިޒާ އާދަމް ހުށަހެޅުއްވި އެ އިސްލާހުގައިވަނީ ނުހައްގު މުއްސަނދިކަން ހޯދައި ލިބިގަތުމުގެ ކުށެއް ކުރީ ރައީސުލްޖުމްހޫރިއްޔާކަމުގެ ނުވަތަ ވަޒީރުކަމުގެ ނުވަތަ ރައްޔިތުންގެ މަޖިލީހުގެ މެންބަރުކަމުގެ ނުވަތަ ފަނޑިޔާރުކަމުގެ މަގާމެއްގައި ހުރި ފަރާތަކުން ކަމުގައިވާނަމަ އެ ކުށަކީ ޖިނާޔަތުގެ ދެވަނަ ދަރަޖައިގެ ކުށެއް ކަމަށް ކަނޑައެޅުމެވެ. އެ ނޫން ހާލަތްތަކުގައި އެ ކުށަކީ ޖިނާޔަތުގެ ތިންވަނަ ދަރަޖައިގެ ކުށެއްކަމަށް ވަނީ ބަޔާންކޮށްފައެވެ.
