އޯލެވެލް ނިންމާ ކުދިންގެ ތެރެއިން އޭލެވެލްއަށް ނުދާ ކުދިންނާއި ވަޒީފާ ހޯދުމަށް ދަތިވާ ކުދިންނަށް އަސްކަރީ ތަމްރީނު ހެދުމަށް ގާނޫނަކުން މަޖުބޫރު ކުރުވުމަށް ނިންމައިފި އެވެ.
ރައީސުލްޖުމްހޫރިއްޔާ ޑރ. މުހައްމަދު މުއިއްޒު މިކަން އިއުލާނު ކުރެއްވީ ނަސްރުގެ ދުވަހުގެ މުނާސަބަތުގައި ރޭ ދަރުބާރުގޭގައި ބޭއްވި ހާއްސަ ރަސްމިއްޔާތުގައި ވާހަކަދައްކަވަމުންނެވެ.
ރައީސް މުއިއްޒު ވިދާޅުވީ އުމުރުން 16 އަހަރުވެފައިވާ އޯލެވެލް ނިންމާ ކުދިން އަސްކަރީ ތަމްރީން ހެދުމަށް މަޖުބޫރުކުރުވުމަށްޓަކައި ”ނެޝަނަލް ސާވިސް ޕްރޮގްރާމް“ގެ ނަމުގައި ގައުމީ ޕްރޮގްރާމެއް ހިންގަން ނިންމާފައިވާ ކަމަށެވެ.
މި ޕްރޮގްރާމު ކުރިއަށް ގެންދާނީ މިކަމާ ގުޅޭ ހާއްސަ ގާނޫނެއްވެސް ހަދައިގެން ކަމަށް ރައީސް ވިދާޅުވި އެވެ.
އެމަނިކުފާނު ވިދާޅުވީ މި ޕްރޮގްރާމު ހިންގުމަށްޓަކައި އަންނަ އަހަރުން ފެށިގެން ދައުލަތުގެ ބަޖެޓްގައި 400 މިލިއަން ރުފިޔާ ހިމަނާނެ ކަމަށެވެ. ދައުލަތުގެ އަންނަ އަހަރުގެ ބަޖެޓް ރައްޔިތުންގެ މަޖިލީހަށް ހުށަހަޅާފައިވާއިރު އެ ބަޖެޓްގައިވެސް 400 މިލިއަން ރުފިޔާ ހިމަނާފައިވާނެ ކަމަށް ވިދާޅުވި އެވެ.
މި ޕްރޮގްރާމު ސަބަބުން ސިފައިންގެއަށް އަހަރު 1000 ކުދިން އަދި ފުލުހުންގެ އިދާރާއަށް އަހަރަކު 250 ކުދިންގެ މަގުން ކުރިއަށް އޮތް ހަތަރު އަހަރު އެ ދެ އިދާރާއަށް ޖުމްލަ 5،000 މީހުން ރެކްރޫޓް ކުރާނެ ކަމަށް ރައީސް ވިދާޅުވިއެވެ.
”މިފަދަ އަސްކަރީ ތަމްރީން ލިބުމަކީ ރަނގަޅު ވަޒީފާ ލިބި އެ ކުދިންނަށާއި ސިފައިންނަށާއި ގައުމަށްވެސް ލިބޭނެ ކުރިއެރުމެއް،“ އެމަނިކުފާނު ވިދާޅުވި އެވެ.
