މަގޭ ސޯލާ ޕްރޮގްރާމުގެ ދަށުން ފޯރުކޮށްދޭ ސޯލާ ޕީވީ ސިސްޓަމްތައް ހޯދުމަށް ބޭނުންވާ ގޭބިސީތަކަށް އެ ފުރުސަތު މި މަހު ހުޅުވާލާނެ ކަމަށް މިނިސްޓްރީ އޮފް ކްލައިމެޓް ޗޭންޖް، އެންވަޔަރަންމަންޓް އެންޑް އެނަޖީއިން ބުނެފިއެވެ.
މި ޕްރޮގްރާމުގެ ދަށުން ކޮންމެ އަތޮޅަކަށް ފޯރުކޮށްދޭ ސޯލާ ޕީވީ ސިސްޓަމްތައް ދޫކުރާ އަދަދު ކަނޑައަޅާނީ، އެ އަތޮޅެއްގެ ކޮންސިއުމަރުންގެ އަދަދުންކަމަށް އެ މިނިސްޓްރީން ބުނެއެވެ.
ރާއްޖޭގައި ބޭނުންކުރާ ކަރަންޓުގެ 33 އިން ސައްތަ އަކީ އިއާދަކުރަނިވި ހަކަތައިގެ ވަސީލަތްތައް ބޭނުންކޮށްގެން އުފައްދާ ކަރަންޓަށް ހެދުމަށް ކަނޑައަޅާފައިވާ ލަނޑުދަނޑިއަށް ވާސިލުވުމަށް އެކުލަވާލާފައިވާ މަގޭ ސޯލާ ޕްރޮގްރާމުގެ ދަށުން ސޯލާ ޕީވީ ސިސްޓަމްތައް ދޫކުރަން ނިންމާފައިވަނީ ހަމައެކަނި ގޭބިސީތަކަށެވެ. މި ސިސްޓަމް ހޯދުމަށް ބޭނުންވާ ފަަރާތްތަަކަށް އެ ފުރުސަތު މިމަހުގެ 28 ގައި ފެނަކައިން ހުޅުވާލާނެކަމަށް އެންވަރަމެންޓް މިނިސްޓްރީން ބުނެއެވެ.
މި ޕްރޮގްރާމުގެ ދަށުން ދޫކުރެވޭނީ 3 އަދި 5 ކިލޯވޮޓުގެ ސިންގަލް ފޭސް އަދި ތްރީ ފޭސް ސިސްޓަމްތައް ކަމަށް މިނިސްޓްރީން ބުނެއެވެ.
މީގެ ތެރެއިން ތިން ކިލޯވޮޓުގެ ސިސްޓަމެއްގެ އަގަކީ -/45،000 (ސާޅީސް ފަސް ހާސް ރުފިޔާ)އެވެ. ފަސް ކިލޯވޮޓުގެ އަގަކީ -/75،000 (ހަތްދިހަ ފަސްހާސް ހާސް ރުފިޔާ)އެވެ.
މި ޕްރޮގްރާމުގެ ދަށުން ފޯރުކޮށްދޭ ސިސްޓަމްތަކަށް އަގު ނެގުމަށް ހަމަޖެހިފައިވަނީ އެއްފަހަރާ ދައްކާގޮތަށް ނުވަތަ 5 އަހަރަށް ބަހާލައިގެން އިންސްޓޯލްމަންޓު ޕްލޭނެއްގެ ދަށުންނެވެ. އެޑްވާންސް ޕޭމަންޓެއް ނުނެގި ނަމަވެސް ހަރުކުރުމުގެ ފީގެ ގޮތުގައި ސިސްޓަމުގެ އަގުގެ ނަގާނެކަމަށާއި އެ ފައިސާ ކޮންޓްރެކްޓުގައި ސޮއިކުރާއިރު ދައްކަންޖެހޭނެކަމަށް މިނިސްޓްރީން ބުނެއެވެ.
މަގޭ ސޯލާ ޕްރޮގްރާމުގެ ދަށުން ސޯލާ ޕީވީ ސިސްޓަމް ހަރުކުރެވޭނެ ގޭބިސީތަކާއި، ގޭބިސީތަކަށް ދޫކުރެވޭ ސޯލާ ޕީވީ ސިސްޓަމްގެ ސައިޒު ކަނޑައަޅާނީ ނެޓް މީޓަރިން އުސޫލުގެ ދަށުން އެދި ފެނަކައަށް ހުށަހަޅާ ގޭބިސީތައް ސާވޭ ކުރުމަށްފަހު ކަމަށް ވެސް އެންވަޔަރންމެންޓް މިނިސްޓްރީން ބުނެއެވެ.
