މީދޫ ދާއިރާގެ ރައްޔިތުންގެ މަޖިލިހުގެ މެންބަރު އަހުމަދު ސިޔާމް މުހައްމަދު (ސަން ސިޔާމް) އާއި ކަމަދޫ އާމިނަތު ޒާރާގެ ކައިވެނީގެ މުނާސަބަތުގައި ކަމަދޫ ރައްޔިތުންނަށް ޚާއްސަ ހަފުލާއެއް ދިނުމަށް ސިޔާމް ނިންމަވައިފިއެވެ.
މި ހަފުލާ ބާއްވަން ނިންމާފައިވަނީ މިހަފުތާ ބަންދުގައެވެ.
ސިޔާމް އާއި ޒާރާގެ ކައިވެނިކޮށްފައިވަނީ މާލެ އަތޮޅުގައި ސިޔާމް ހިންގަވާމުންއަންނަ އޮޅުވެލި ރިސޯޓުގައެވެ. މި ކައިވެންޏަކީ ރާއްޖޭގައި ފަހުގެ ތާރީހެއްގައި އެންމެ ގިނަ ބައެއްގެ ސަމާލުކަން ލިބުނު ކައިވެންޏެވެ. ކައިވެނީގެ ހަފުލާގައި ޒާރާގެ އާއިލާގެ ގިނަ ބަޔަކު ބައިވެރިވިއެވެ.
ކަމަދޫ ރައްޔިތުންނަށް ބާއްވާ ޚާއްސަ ހަފުލާގެ އިތުރުން، ސިޔާމް ވަނީ ކައިވެންޏާ ދިމާކޮށް ކަމަދޫއަށް ތިން އަސް ވެސް ފޮނުވާފައެވެ. މީގެ ތެރޭގައި ހިމެނެނީ ހުދުކުލައިގެ ދެ އަހާއި މުށިކުލައިގެ އަހެކެވެ. ސިޔާމަކީ އަހަށް ވަރަށް ލޯބިކުރައްވާ ބޭފުޅެއްކަން ފާހަގަކޮށްލެވެއެވެ.
ސިޔާމް އާއި ޒާރާގެ ރަންކިޔުމުގެ ހަފުލާއަށް ވެސް ގިނަ ބައެއްގެ ސަމާލުކަން ލިބުނެވެ. މި ހަފުލާގައި ޒާރާ ވަނީ ސިޔާމަށް އަމާޒުކޮށް ހާއްސަ ލަވައެއް ވެސް ކިޔައިދީފައެވެ. މި ލަވައިގައި ހިމެނެނީ އެ ދެ މީހުންގެ ކައިވެންޏާއި ސިޔާމާ މެދު ޒާރާ ދެކޭ ގޮތުގެ ވާހަކަތަކެވެ.
ކަމަދޫ ރައްޔިތުންނަށް ބާއްވާ ހަފުލާގައި މި ލަވަ އަޑުއެހުމުގެ ފުރުސަތު ލިބޭނެކަމަށް ބެލެވެއެވެ.
