މޫސުން ގޯސްވުމާއި ގުޅިގެން ދަތުރުފަތުރު ނުކުރެވުމުގެ ސަބަބުން އޭދަފުށީގައި ތަރުކާރީއާއި މޭވާ ހުސްވެ ބައެއް ބާވަތުގެ ކާބޯތަކެތިވެސް ލިބުން ދަތިވެއްޖެ އެވެ.
ރާއްޖެއަށް މިހާރު ކުރަމުންދާ ވިއްސާރައިގާ ކަނޑު ދަތުރު ކުރުމަށް ބުރޫ އަރާފައިވާތީ ބައެއް ރަށްރަށުން ކާޑުގެ ބާވާތްތަކާއި ޒަރޫރީ ތަކެއްޗަށް ދަތިވެފައިވާ ކަމަށް ނޭޝަނަލް ޑިޒާސްޓަރ މެނޭޖްމެންޓް އޮތޯރިޓީ (އެންޑީއެމްއޭ)އިން ވެސް ވަނި މިއަދު ބުނެފަ އެވެ.
އޭދަފުށީގައި ހޯލްސޭލް/ ރިޓޭއިލް ވިޔަފާރި އެންމެ ފުޅާކޮށް ހިންގަމުން އަންނަ ފަސްމުގޫ ފިހާރައިން މައުލޫމާތު ދިން ގޮތުގައި އެ ތަނުންވެސް ވަނީ ތަރުކާރީއާއި މޭވާގެ އިތުރުންވެސް ބައެއް ބާވަތްތަކުގެ ކާބޯތަކެތި މުޅިން ހުސްވެފައެވެ.
”މޫސުމް ގުޅިގެން ދަތުރު ނުކުރެވި ދިއުމުން ދިމާވި ގޮތެއް މިއީ. ޔަގީންކޮށް ބުނާކަށް ނޭނގެ ލިބޭނެ ދުވަހެއްވެސް. އޭދަފުއްޓަށް މުދާ އުފުލާ ބޯޓު ފަހަރުވެސް އަދި އޮތީ ދަތުރު ކުރާ ގޮތަކަށް ނޫން. “ އެފިހާރައިން ބުންޏެވެ.
އެކަމަކު ފަސްމުގޫ ފިހާރައިން ބުނީ މާދަމާ އެފިހާރައަށް މުދާ ހިފައިގެން ބޯޓެއް އައުމަށް ހަމަޖެހިފައިވާ ކަމުގައެވެ.
”އިރާދަ ކުރެއްވިއްޔާ މާދަމާ ތަރުކާރީ އާއި ބިހާ އަދިވެސް ދިރިއުޅުމަށް ބޭނުންވާނެ ޒަރޫރީ ކާބޯތަކެތި ލިބޭނެ. އަގަކަށްވެސް ބަދަލެއް ނާންނާނެ،“ ފަސްމުގޫ ގްރޫޕްގެ ޑިރެކްޓަރު އިސްމާއިޅް ޝަހީމް މައުލޫމާތު ހާމަކުރި އެވެ.
މެޓް އޮފީހުން މިހާރު ވަނީ ކުރިއަށް އޮތް ދެ ދުވަހު މޫސުން އެއްކޮށް ރަނގަޅު ނުވިޔަސް ދަތުރުކުރެވޭވަރު ވާނެ ކަމަށް ވިދާޅުވެފައެވެ.
