ކުރިއަށް އޮތް 20 ވަނަ ރައްޔިތުންގެ މަޖިލީހުގެ އިންތިޚާބުގައި އޭދަފުށީ ދާއިރާއަށް ވާދަކުރެއްވުމަށް މިހާރުވެސް މި ދާއިރާގެ މެންބަރު، އަހުމަދު ސަލީމް އިލެކްޝަން ކޮމިޝަނަށް ކެންޑިޑެންސީ ފޯމް ހުށަހަޅުއްވައިފިއެވެ.
ސަލީމްގެ ކެންޑިޑެންސީ ފޯމް އީސީއަށް ހުށަހަޅުއްވާފައި ވަނީ އޭނާއަށް ތާއިދު ކުރައްވާ ގިނަ އަދަދެއްގެ މެމްބަރުންނާއި އެކު އީސީއަށް ވަޑައިގެން މިއަދު އެވެ.
ކުރިއަށް އޮތް 20 ވަނަ ރައްޔިތުން މަޖިލީހުގެ އިންތިޚާބުގައި ސަލީމް ވާދަކުރައްވަނީ ޕީއެންސީގެ ޓިކެޓުގައެވެ. ސަލީމަށް ޕީއެންސީ ޓިކެޓް ލިބިވަޑައިގަތީ އެދާއިރާއަށް ޕީއެންސީގެ ފަރާތުން އެެހެން ކެންޑިޑޭޓަކު ކުރިމަތި ލެއްވުމުގެ ޝައުގުވެރިކަން ފާޅުކޮށްފައި ނުވުމާއި އެކު ޕްރައިމަރީއަކާ ނުލައެވެ.
ސަލީމް ވަނީ ވޭތުވެ ދިޔަ 3 ދައުރުގައިވެސް އޭދަފުށީ ދާއިރާގެ މެންބަރު ކަން އަދާކުރައްވައި މިދާއިރާގެ އެންމެ ގިނަ ދުވަހު މަޖިލީހުގައި ހުންނެވުމުގެ ރެކޯޑްވެސް ހޯއްދަވާފަ އެވެ.
