ރިޔާސީ އިންތިހާބުގެ ދެވަނަ ބުރުގައި ރައީސް އިބްރާހިމް މުހައްމަދު ސޯލިހާއި އެކުކުރާ މަޝްވަރާތަކުން ފެހި ސިގްނަލެއް ލިބިވަޑައިގެންފައިވާ ކަމަށް ރައީސުލްޖުމްހޫރިއްޔާ އަދި އެމްޑީޕީގެ ރިޔާސީ ކެންޑިޑޭޓް އިބްރާހީމް މުހައްމަދު ސޯލިހު މިއަދު ވިދާޅުވެއްޖެ އެވެ.
ރާއްޖެ ޓީވީގެ “ފަށާއިރު” ޕްރޮގްރާމަށް މިއަދު ދެއްވި އިންޓަވިއު އެއްގައި ރައީސް ސޯލިހު ވިދާޅުވީ މިހާރުވެސް އެ ވާހަކަ ދެވެމުންދާ ކަމަށާއި އަދި ބައެއް ފަރާތްތަކުން އެކަމަށް ފެހި ސިގްނަލްވެސް ލިބިފައިވާ ކަމަށެވެ.
”ރަސްމީކޮށް އެކަން އިއުލާނު ކުރެވޭ ހިސާބަކަށް އަދި ނުދޭ“ ރައީސް ސޯލިހު ވިދާޅުވިއެވެ. ނަމަވެސް ރިޔާސީ އިންތިހާބުގެ ދެވަނަ ބުރުގައި އެމްޑީޕީއާއެކު ކޯލިޝަން ހެދުމަށް މަޝްވަރާތައް ކުރިއަށްދާއިރު ދެ ޕާޓީ ނުވަތަ ތިން ޕާޓީން ކޯލިޝަން ހަދާނެ ކަމަށް ގަބޫލުކުރެވޭ ކަމަށް އެމަނިކުފާނު ވިދާޅުވި އެވެ.
މިއަހަރުގެ ރިޔާސީ އިންތިހާބުގެ ދެ ވަނަ ބުރުގައި ވާދަކުރައްވާނީ ރައީސް ސޯލިހު އާއި ޕީއެންސީގެ ކެންޑިޑޭޓް ޑރ.މުހައްމަދު މުއިއްޒެވެ. ފުރަތަމަ ބުރުގައި ރައީސް ސޯލިހަށް ވަނީ 85،935 ވޯޓު ލިބިވަޑައިގެންފަ އެވެ. އިދިކޮޅު ކެންޑިޑޭޓު ޑރ.މުއިއްޒު އަށް ވަނީ 101،180 ވޯޓު ލިބިވަޑައިގެންފަ އެވެ. ދެ ވަނަ ބުރުގެ ވޯޓުލުން އޮންނާނީ މިމަހުގެ 30 ވާ ހޮނިހިރު ދުވަހު އެވެ.
