މާދަމާއަކީ ވެސް ސަރުކާރު ބަންދު ދުވަހެއް ގޮތުގައި ރައީސުލްޖުމްހޫރިއްޔާ އިބްރާހިމް މުހައްމަދު ސޯލިހު ހަމަޖައްސަވައިފިއެވެ.
ރައީސް އޮފީހުގެ ތަރުޖަމާން މިއުވާން މުހައްމަދު ކުރެއްވި ޓްވީޓެއްގައި ވިދާޅުވީ ރިޔާސީ އިންތިޚާބުގެ މަސައްކަތްތަކުގައި ސަރުކާރުގެ ގިނަ އަދަދެއްގެ މުވައްޒަފުންނާއި އާންމުން ކުރަންޖެހުނު މަސައްކަތްތައް އަދި ވެސް ނުނިމޭތީ އިލެކްޝަންސް ކޮމިޝަނުގެ އެދުމުގެ މަތީން މާދަމާ އަކީ ވެސް ސަރުކާރު ބަންދު ދުވަހެއްކަމުގައި ރައީސުލްޖުމްހޫރިއްޔާ ހަމަޖައްސަވާފައިވާ ކަމަށެވެ.
ސަރުކާރުން މީގެ ކުރިން ވަނީ އިއްޔެ ރިޔާސީ އިންތިހާބު ބާއްވާތީ މިއަދަކީ ވެސް ބަންދު ދުވަހެއް ކަމަށް ކަނޑައަޅާފައެވެ.
އިއްޔެ ބޭއްވި ރިޔާސީ އިންތިހާބު ކާމިޔާބު ކުރުމަށް މި ސަރުކާރުން ނުކުތް ނަމަވެސް ސަރުކާރު މައްޗަށް ކުރި ހޯއްދަވާފައިވަނީ އިދިކޮޅު ކެންޑިޑޭޓް، ޑރ. މުހައްމަދު މުއިއްޒުއެވެ. މުއިއްޒަށް އިންތިޚާބުގައި 46 އިންސައްތަ ލިބިވަޑައިގަތްއިރު، ރައީސް ސޯލިހަށް ލިބިވަޑައިގަތީ 39 އިންސައްތައެވެ. އެހެން ކަމުން މިމަހުގެ 30 ވަނަ ދުވަހު އިންތިހާބުގެ ދެވަނަ ބުރެއް ބާއްވާނެ ކަމަށް ބެލެވެއެވެ.
