މިއަހަރު އަަލަށް ސްކޫލާ ގުޅުނު 135 ކުދިންނާއެކު ޖުމްލަ 815 ދަރިވަރުންނާއެކު ބ.އަތޮޅު ތައުލީމީ މަރުކަޒުގެ ދިރާސީ އަހަރުގެ ކިޔެވުން މިއަދު ފަށައިފިއެވެ.
ބ. އަތޮޅު ތައުލީމީ މަރުކަޒުން މައުލޫމާތު ދިން ގޮތުގައި މިއަދު ސްކޫލްގެ ކިޔެވުންފެށިއިރު ދަރިވަރުންނަށް ބޭނުންވާ ހުރިހާ ޓެކްސްޓް ފޮތްތަކާއެކު ކިޔަވައިދޭ ޓީޗަރުންވެސް ވަނީ ހަމަވެފައެވެ. މީގެ އިތުރުން މިއަހަރު ސްކޫލަށް އަލަށް އިތުރުވި ޕްރީސްކޫލްކުދިންނަށް ބޭނުންވާ ގޮނޑިމޭޒާ ޑެސްކް ފަދަ ތަކެތިވެސް ވަނީ ހަމަކޮށް ނިމިފައެވެ.
އެނގިވަޑައިގަންނަވާނެ ފަދައިން މިއަދަކީ ރާއްޖޭގެ ހުރިހާ ސްކޫލެއްގައިވެސް ދިރާސީ އާއަހަރުގެ ކިޔެވުން ފެށި ދުވަހެވެ. 75000 އަށްވުރެ ގިނަ ދަރިވަރުންނާއެކު ރާއްޖޭގެ 223 ސްކޫލްގައި މިއަދު ކިޔެވުން ފެށިއިރު 6400 ޓީޗަރުން ސްކޫލްތަކުގައި ކިޔަވައިދެމުން ގެންދާނެކަމަށް އެޑިއުކޭޝަން މިނިސްޓްރީންވަނީ ވިދާޅުވެފައެވެ. އެއީ 4200 ދިވެހި ޓީޗަރުންނާއި 2200 ބިދޭސީ ޓީޗަރުންނެވެ.
އެޑިއުކޭޝަން މިނިސްޓްރީންބުނީ މިއީ މިދިޔަ އަހަރު ރާއްޖޭގެ ސްކޫލްތަކުގައި މަސައްކަތްކުރި ބިދޭސީ ޓީޗަރުންނަށް ވުރެެ ބޮޑުތަން ދަށް އަދަދެއް ކަމުގައެވެ.