ރަށްރަށުގައި އުޅޭ މީހުން މާލެ އަންނަނީ ރަށުގައި ރަށުގައި މަޖާކުރަން ކުރާނެކަމެއް ނެތިގެން ނޫނުްކަމަށް ވިދާޅުވެ ކެންދޫ ދާއިރާގެ މެންބަރު އަލީ ހުސެން، މަޖިލީހުގެ ރައީސް ނަޝީދަށް ރައްދު ދެއްވައިފި އެވެ.
މިދިޔަ އަންގާރަދުވަހު މަޖިލީހުގެ ޖަލްސާގައި ވާހަކަފުޅު ދައްކަވަމުން ނަޝީދު ވިދާޅުވީ އަތޮޅުތެރެއިން މީހުން މާލެއަށް ހިޖުރަކުރަނީ ރަށްރަށުގައި ކުރާނެ ކަމެއް ނެތުމާއެކު މުނިފޫހިފިލުވަންކަމަށެވެ. އެގޮތުން ރަށްރަށުގައި ސިނަމާފަދަ ތަންތަން ނުހުންނަކަމަށް ނަޝީދު ވިދާޅުވިއެވެ.
ރައީސް ނަޝީދުގެ މި ވާހަކަތަކާއި ގުޅިގެން ވަރަށް ގިނަ ބަޔަކު ވަނީ އެކަމަށް ނުރުހުން ފާޅުކޮށް ބޮޑެތި ފާޑުކިއުންތައް ވެސް އަމާޒުވެފައެވެ.
އަހަރެން މާލެ އައީ އުމުރުން 16 އަހަރު ފުރުނުފަހުން. އިނގިރޭސި އެއްވެސް ވަރަކަށް ނޭނގޭތީ ވަންނަންޖެހުނީވެސް MES ގްރޭޑް 6 އަަށް. މިއީ ދައްކަން މާ މަޖާ ވާހަކައެއް ނޫން. މާލެ އައީކީ ރަށުގައި މަޖާކުރަން ކުރާނެ ކަމެއް ނެތިގެން ނޫން.
— Ali Hussain (@AleeVoice) September 8, 2022
ނަޝީދުގެ އެ ވާހަކަތަކަށް ރައްދު ދެއްވަމުން ރައްޔިތުންގެ މަޖިލީހުގެ ކެންދޫ ދާއިރާގެ މެންބަރު އަލީ ހުސެން ވިދާޅުވީ އޭނާ މާލެއަށް ހިޖުރަ ކުރެއްވީ އުމުރުން 16 އަހަރު ފުރުނު ފަހުންކަމަށެވެ. އަދި މާލެއައި އިރު އެއްވެސް ވަރަކަށް އިނގިރޭސި އެނގިވަޑައި ނުގަންނަވާތީ ވެދެވަޑައިގަންނަވަން ޖެހުނީވެސް އެމްއީއެސްގެ ގްރޭޑް 6 އަށް ކަމަށެވެ.