ވިޔަފާރީގައި ހަރަކާތްތެރިވާ އަންހެނުން ބާރުވެރިކުރުވުމުގެ ގޮތުން، އެސޯސިއޭޝަން އޮފް ބިޒްނަސް ވިމެން އިން ކޮމާސް އެންޑް އިންޑަސްޓްރީ (އޭ.ބީ.ޑަބްލިއު،.ސީ.އައި)ގެ ރާއްޖޭގެ ބްރާންޗް އިފްތިތާހު ކޮށްފިއެވެ.
މިޖަމިއްޔާ އިފްތިތާހު ކޮށްދެއްވީ މިއަދު މެންދުރުފަހު ސޯޝަލް ސެންޓަރުގައި ރައީސުލްޖުމްހޫރިއްޔާގެ އަނބިކަނބަލުން ފަޒްނާ އަހުމަދު އެވެ.
އޭ.ބީ.ޑަބްލިއު.ސީ.އައި އަކީ ބައިނަލްއަޤްވާމީ ގޮތުން އަންހެނުންގެ ޗެމްބަރ އޮފް ކޮމާސްގެ ގޮތުގައި ވަރޗުއަލްކޮށް ހަރަކާތްތެރިވާ ޕްލެޓްފޯމެކެވެ. އޭ.ބީ.ޑަބްލިއު.ސީ.އައިގެ މެންބަރުންގެ ތެރޭގައި އެންމެ ފާހަގަކޮށްލެވޭ އަންހެން ވިޔަފާރިވެރިންނާއި، އަންހެނުންގެ ޖަމްޢިއްޔާ ޖަމާޢަތްތަކާއި، ތަޢުލީމީ މުއައްސަސާތަކާއި، އަންހެނުންނަށް ޚާއްޞަކޮށްގެން އިންވެސްޓްކުރާ ކުންފުނިތަކުގެ މެންބަރުން ވެސް ހިމެނެ އެވެ.
މި ޖަމިއްޔާގެ މައިގަނޑު މަގްސަދަކީ އަންހެނުން ގެ ވިޔަފާރިވެރިކަމަށް ރިއާޔަތްކޮށް މުސްތަގުބަލުގެ ބޭނުންތައް ދެނެގަނެ، އަންހެން ވިޔަފާރިވެރިންނަށް ކުރިމަތިވާ ގޮންޖެހުންތަކަށް އިޖާބަދީ، ދުނިޔޭގެ އިގްތިސާދުގައި އެފަރާތްތަކަށް އެހީތެރިވެދިނުމެވެ.
