ރާއްޖޭގެ ބޭރު ފައިސާގެ ރިޒާވް ދަށްވެ ދަރަނިީގެ ނުރައްކާ އެބައޮތްކަމަށް އިންޓަނޭޝަނަލް މަނިޓަރީ ފަންޑް (އައިއެމްއެފް) އިން ބުނެފިއެވެ.
ރާއްޖޭގެ އިގްތިސާދީ ހާލަތު ދެނެގަތުމަށް އައިއެމްއެފްގެ ވަފުދެއް މިދިޔަ މަހުގެ 21އިން 29 އަށް ރާއްޖެ ޒިޔާރަތްކޮށް ހޯދި ހޯދުންތަކާއި ދެކޭގޮތް ހާމަކޮށް ނެރުނު ބަޔާނުގައި ބުނީ މި އަހަރުގެ ރާއްޖޭގެ އިގްތިސާދީ ކުރިއެރުން ހުންނާނެ ކަމަށް ލަފާ ކުރެވެނީ 8.7 އިންސައްތައިގައި ކަމަށެވެ.
ދުނިޔޭގެ ބާޒާރުގައި ތެލާއި ތަކެތީގެ އަގުތައް މައްޗަށް ދިއުމާ ގުޅިގެން ރާއްޖޭގެ އިންފްލޭޝަން ރޭޓް މި އަހަރު 3.1 ޕަސެންޓަށް އަރާނެ ކަމަށް ލަފާކުރެވޭ ކަމަށްވެސް އައިއެމްއެފް އިން ވަނީ ބުނެފައެވެ. އަދި ތެލާއި ތަކެތީގެ އަގު އުފުލުމުގެ ސަބަބުން ސަބްސިޑީއަށް ކުރަން ޖެހޭ ހަރަދު އިތުރުވާނެ ކަމަށާއި އަންނަ އަހަރުގެ ރިޔާސީ އިންތިހާބާއެކު އިތުރު ހަރަދުތައް ކުރަން ޖެހޭނެ ކަމަށް ވެސް އައިއެމްއެފް އިން ބުނެއެވެ.
ސަރުކާރު ހިއްސާވާ ކުންފުނިތަކުގެ ހަރަދުތައް ބެލެހެއްޓުމަށް ދައުލަތުގެ ބަޖެޓުން ޚަރަދުކުރަން ޖެހުމަކީ އިގްތިސާދީ އަދި މާލީ ހާލަތަށްވެސް ބޮޑު ގޮންޖެހުމެއް ކަމަށް އައިއެމްއެފް އިން ބުންޏެވެ.
އޭގެ އިތުރުން އިގްތިސާދު އިއާދަކުރުމަށް ސަބްސިޑީއަށް ބަދަލު ގެނައުމާއި، ޓީޖީއެސްޓީ އަދި ޖީއެސްޓީ ބޮޑުކުރަން ސަރުކާރުން ގެންގުޅޭ ވިސްނުމަށް އައިއެމްއެފް އިން ވަނީ މަރުހަބާ ކިޔާފައެވެ. އައިއެމްއެފް އިން ބުނީ އެ ފިޔަވަޅުތަކަކީ ރާއްޖޭގެ އިގްތިސާދު އިއާދަކުރުމަށް އެޅި މުހިންމު ފިޔަވަޅުތަކެއް ކަމަށެވެ.
