މާލޭގައި ހިންގާ އަތޮޅު ފިހާރަތަކުގެ ކުލީގެ ހުރިހާ ފައިސާއެއް އަތޮޅު ކައުންސިލްތަކަށް ދިނުމަށް ރައީސުލްޖުމްހޫރިއްޔާ އިބްރާހީމް މުހައްމަދު ސޯލިހް ނިންމަވައިފި އެވެ.
ރައީސް ސޯލިހް މިގޮތަށް ނިންމެވީ މިހާރު އއ. އުކުޅަހުގައި ކައުންސިލްތަކާ އެކު ކުރިއަށް ގެންދާ ވިއަވަތި ކޮންފަރެންސްގަ އެވެ.
ރައީސް ވިދާޅުވި ގޮތުގައި އަންނަ ހަފުތާ ތެރޭގައި 2017-2019 ވަނަ އަހަރަށްވާ ކުލި ކައުންސިލްތަކަށް ދޫކުރައްވާނެ އެވެ. ފިނޭންސް މިނިސްޓަރު އިބްރާހިމް އަމީރު ހާމަ ކުރެއްވި ގޮތުގައި އެއީ 34 މިލިއަން ރުފިޔާ އެވެ.
އަތޮޅު ފިހާރަތަކީ، އަތޮޅުތަކުގެ ރައްޔިތުން ވަރަށް ބުރަ މަސައްކަތުން އިމާރާތް ކޮށްފައިވާ ތަންތަނެކެވެ. އެ ފިހާރަތައް ފިނޭންސް މިނިސްޓްރީގެ ދަށަށް ބަދަލުކުރެވި އަތޮޅު ކައުންސިލުތަކަށް ލިބެމުންދަނީ އެ ތަންތަނުން ލިބޭ އާމްދަނީގެ ދެބައިކުޅަ އެއްބަ އެވެ. ނަމަވެސް ރައީސް ސޯލިހްގެ މިއަދުގެ ނިންމެވުމާ ގުޅިގެން އަތޮޅު ފިހަރާތަކުން ކުލީގެ ގޮތުގައި ލިބޭ ހުރިހާ ފައިސާއެއް ކައުންސިލްތަކަށް ލިބިގެންދާނެ އެވެ.
އަތޮޅު ފިހާރަތަކުގެ ފައިސާ ކައުންސިލްތަކަށް އެންމެ ފަހުން ދީފައިވަނީ 2019 ވަނަ އަހަރު އެވެ. އެއީ 2015 ވަނަ އަހަރުގެ ފައިސާ އެވެ. އެ އަހަރު އަތޮޅު ކައުންސިލްތަކަށް 12 މިލިއަނަށް ވުރެ ގިނަ ރުފިޔާ ފިނޭންސް މިނިސްޓްރީން ޖަމާކުރި އެވެ.
އަތޮޅު ފިހާރަތަކުގެ ކުލީގެ ގޮތުގައި ލިބުނު ފައިސާގެ ބައެއް މިދިޔަ އަހަރުވެސް ފިނޭންސް މިނިސްޓްރީން ވަނީ އަތޮޅު ކައުންސިލްތަކަށް ޖަމާކޮށްދީފަ އެވެ. މިދިޔަ އަހަރު ޖަމާކޮށްދިނީ 2016 ވަނަ އަހަރާއި 2017 ވަނަ އަހަރު އަތޮޅު ފިހާރަތަކުން އަތޮޅު ކައުންސިލްތަކަށް ލިބެން ޖެހޭ ފައިސާގެ ތެރެއިން އަތޮޅުތަކަށް ލިބޭ 50 ޕަސަންޓެވެ. އެގޮތުން 2016 ވަނަ އަހަރު އަތޮޅު ފިހާރަތަކުން ލިބުނު އާމްދަނީގެ ގޮތުގައި 17.9 މިލިއަން ރުފިޔާ އަދި 2017 ވަނަ އަހަރުގެ ކުލީގެ ގޮތުގައި 20.5 މިލިއަން ރުފިޔާ 20 އަތޮޅުގެ އެކައުންޓަށް ޖަމާ ކޮށްދީފައިވެ އެވެ.
ލާމަރުކަޒީ ގާނޫނަށް ގިނަ އިސްލާހުތަކެއް ގެނެސް ކައުންސިލްތަކަށް މިސަރުކާރުން ގެންދަނީ ބޮޑެތި ބާރުތަކެއް ދެމުންނެވެ. ކައުންސިލްތަކަށް ދައުލަތަށް ލިބޭ އާމްދަނީގެ ފަސް ޕަސަންޓް ދިނުމަށް ނިންމާ އެ ފައިސާ ވެސް ސަރުކާރުން ގެންދަނީ ކައުންސިލްތަކަށް ދޫކުރަމުންނެވެ.
މާލޭގެ ދެކުނު ހާބަރުގައި ހުންނަ އަތޮޅު ފިހާރަތަކުން ކައުންސިލްތަކަށް ލިބެން ޖެހޭ ފައިސާ ލިބެމުން ނުދާތީ ބައެއް ކައުންސިލްތަކުން ވަނީ ކަންބޮޑުވުން ފާޅުކޮށް އެ ފިހާރަތައް، އަތޮޅު ކައުންސިލްތަކަށް ރަޖިސްޓްރީކޮށް ދިނުމަށާއި ސީދާ އަތޮޅުތަކަށް ލިބޭ ގޮތް ހަދައިދިނުމަށް ކުރިން ވެސް އެދިފައެވެ.
