އޭދަފުށިން މިއަހަރުގެ ފިތުރު ޒަކާތުގެ ގޮތުގައި ލިބިފައިވާ 56860 ރުފިޔާ އޭގެ ހައްގުވެރިންނަށް ދީ ނިންމައިފި ކަމަށް އޭދަފުށީ ކައުންސިލުން ބުނެފިއެވެ.
އެ ކައުންސިލުން މިއަދު ހާމަކުރި ބަޔާނެއްގައިވާ ގޮތުން މިއަހަރު އޭދަފުށިން ފިތުރު ޒަކާތް ދައްކާފައިވަނީ 2522 މީހުންނެވެ. ފަގީރުންގެ ގޮތުގައި ރަޖިސްޓްރީ ކޮށްފައިވަނީ 21 މީހުންނެވެ.
މި ފައިސާ އެމީހުންގެ މެދުގައި ބެހުމުން ބޮލަކަށް ޖެހެނީ 2707.62 ރުފިޔާ އެވެ.
އޭދަފުށީން މިއަހަރު ފިތުރު ޒަކާތަށް ލިބުނު ފައިސާ މިދިޔަ އަހަރަށްވުރެ 1319 ރުފިޔާ ގިނަވާއިރު ފަގީރުންގެ ލިސްޓަށް އެކަކު އިތުރު ވެފައިވާކަން ފާހަގަ ކުރެވެއެވެ.
ފިތުރު ޒަކާތަކީ ކޮންމެ މުސްލިމެއްގެ މައްޗަށް ވާޖިބުވެގެންވާ ކަމެކެވެ. މައިމީހާގެ ބަނޑުގައިވާ، ފުރާނަ އެޅިފައިވާ ދަރިފުޅަށް ފިތުރު ޒަކާތް ނެރުން ސުންނަތް ވެގެންވެއެވެ. ފިތުރު ޒަކާތް ވާޖިބުވަނީ އީދު ދުވަހާއި އީދުވިލޭރޭ، ކެއުމަށްފަހު ބާކީވާ ވަރަށް ހުރުމާއެކުއެވެ. ފިތުރު ޒަކާތް ދިނުން އީދު ދުވަހަށްވުރެ ފަސް ކުރުމަކީ ހަރާން ކަމެކެވެ.
