މާލެއާއި އަތޮޅުތެރެއިން ޖުމްލަ 2821 ދަރިވަރުންނާއެކު އޭލެވެލް އިމްތިހާނު މިއަދު ފަށައިފިއެވެ.
އެއީ އަތޮޅުތަކުގެ ސްކޫލުތަކުން 931 ދަރިވަރުންނާއި މާލޭގެ ސްކޫލުތަކުން 1890 ދަރިވަރުންނެވެ.
އޭ ލެވެލް އިމްތިހާން މިފަހަރު އޮންނަނީ މާލޭގެ 6 ސެންޓަރުގެ އިތުރުން އަތޮޅުތެރޭގެ 38 ސެންޓަރެއްގަ އެވެ.
މިފަހަރު އޭ ލެވެލް އިމްތިހާންގައި ފުރަތަމަ ހަދަނީ ހިސާބު ޓެސްޓެވެ. އަދި އެންމެ ފަހު ޓެސްޓް އޮތީ އަންނަ މަހު 14 ގައެވެ. އެއަށްފަހު ޖޫން މަހު 13-17 ގައި ދިވެހި އިސްލާމް ޓެސްޓް ބާއްވާ ގޮތަށްވަނީ ހަމަޖެހިފައެވެ.
އޭ ލެވެމް އިމްތިހާނު ބާއްވަން އެންމެ ފުރަތަމަ އުޅުނީ މެއި/ޖޫންގަ އެވެ. ނަމަވެސް އެޑެކްސެލް އިން އެ ޓެސްޓު ބާއްވާ ތާރީޚު މި މަހަށް ކުއްލިއަކަށް އަވަސްކުރިއެވެ. އެއާއެކު ގިނަ ދަރިވަރުންނާއި ބެލެނިވެރިން ކަންބޮޑުވުން ފާޅުކުރަމުން ދިއުމުން އެޑިއުކޭޝަން މިނިސްޓްރީން ވަނީ އަންނަ އޮކްޓޯބަރު/ނޮވެމްބަރުގައި ވެސް އޭ ލެވެލް އިމްތިހާނު ހެދުމުގެ ފުރުސަތު ދީފައެވެ. މިއާއެކު ބައެއް ސުކޫލުތަކުން އޮކްޓޯބަރު/ނޮވެމްބަރު އިމްތިހާން ހެދުމަށްވަނީ ބާރު އަޅާފައެވެ.
