މާލޭ މީހަކަށް ވީމާ ކުޅަނދު ހަމަވެފައި، ރަށްރަށުގެ މީހަކަށް ވީތީ ކުޅަނދު މަދުވާނެ ކަމަކަށް މިހާރު ގިނަ ދިވެހިން ގަބޫލެއް ނުކުރާކަމަށް ކެންދޫ ދާއިރާގެ މެންބަރު އަލީ ހުސެން ވިދާޅުވެއްޖެއެވެ.
އެމްޕީ އަލީ މިހެން ވިދާޅުވެފައިވާއިރު، ލޯކަލް ކައުންސިލު އިންތިޚާބުގައި މާލޭ ސިޓީގެ މޭޔަރުކަމަށް ވާދަކުރައްވައި އިންތިޚާބު ކާމިޔާބުކުރެއްވި ކުރީގެ ހައުސިން މިނިސްޓަރު ޑރ.މުހައްމަދު މުއިއްޒަކީ ވަށަފަރު ބޭފުޅެއްކަމަށް ބުނެ އެމްޑީޕީން ވަނީ މަލާމަތް ކުރައްވައިފައެވެ. ހަމައެހެންމެ ރައީސް އިބްރާހިމް މުހައްމަދު ސޯލިހަކީވެސް ހިންނަވަރު ބޭފުޅަކަށްވުމުން އިދިކޮޅުގެ މަލާމާތުގެ ބަސްތައް ވެސް އަމާޒުވެފައިވެއެވެ.
އިއްޔެ އެމްޕީ އަލީ ކުރެއްވި ޓްވީޓެއްގައި ވިދާޅުވީ ވަށަފަރެއް, ހިންނަވަރެއް ކިޔާނެ ކަމެއްނެތް ކަމަށާއި, ”ބޭފުޅިޒަމް“ އާއި، ”ރޭސިޒަމް“ ނުވަތަ ނަސްލީ ތަފާތުކުރުމަކަށް 21 ވަނަ ގަރުނުގައި ޖާގައެއް ނޯންނާނެކަމަށެވެ.
”ވަށަފަރެއް، ހިންނަވަރެއް ކިޔާނެ ކަމެއްނެތް. މާލޭ މީހަކަށް ވީމާ ކުޅަނދު ހަމަވެފައި، ރަށްރަށުގެ މީހަކަށް ވީތީ ކުޅަނދު މަދުވާނެ ކަމަކަށް މިހާރު ގިނަ ދިވެހިން ގަބޫލެއް ނުކުރޭ. ބޭފުޅިޒަމްއާއި، ރޭސިޒަމްއަށް 21 ވަނަ ގަރުނުގައި ޖާގައެއް ނޯންނާނެ“ މެންބަރު އަލީ ވިދާޅުވިއެވެ.
ވަށަފަރެއް ހިންނަވަރެއް ކިޔާނެ ކަމެއްނެތް. މާލެ މީހަކަށް ވީމާ ކުޅަނދު ހަމަވެފައި ރަށްރަށުގެ މީހަކަށް ވީތީ ކުޅަނދު މަދުވާނެ ކަމަކަށް މިހާރު ގިނަދިވެހިން ގަބޫލެއް ނުކުރޭ. ބޭފުޅިޒަމްއާއި ރޭސިޒަމްއަށް 21 ވަނަ ގަރުނުގައި ޖާގައެއް ނޯންނާނެ.
— Ali Hussain (@AleeVoice) April 15, 2021
ވޭތުވެދިޔަ ތަނުގައި އަތޮޅުތަކުގެ ރައްޔިތުން ދެރަކޮށްލުމުގެ ގޮތުން މުސްކުޅި ބަހެއްގެ ގޮތުގައި ”ބީރައްޓެއްސެއްވިއްޔާ ފަސްކުޅަނދު މަދުވާނެ“ކަމަށް މާލޭ މީހުން ބުނެ އުޅެއެވެ. މި ބަސް ބޭނުންކޮށް އުޅުނީ ”ރާއްޖެތެރޭގެ“ މީހުންނަށް ކަންކަން އޮޅުން ނުފިލާތީކަމަށް ބުނެއެވެ. ”ކުޅަނދު“ އަކީ 25 މަދޮށީގެ ބަރުދަނެވެ. ނުވަތަ 5.8 ގުރާމުގެ ބަރުދަނެވެ.
