2012 ވަނަ އަހަރުގެ ފެބްރއަަރީ 8ވަނަ ދުވަހު ރާއްޖޭގެ އެކި ސަރަހައްދުތަކަށް ނިކުމެ ތަންތަނުގައި ހުޅުޖަހައި ހެދި މީހުންނަށް އިތުރު ފުރުސަތެއް ނުދިނުމަށް ކުރީގެ ނައިބު ރައީސް ޑރ.މުހައްމަދު ޖަމީލް އަހުމަދު މިއަދު ގޮވާލައްވައިފިއެވެ.
2012 ވަނަ އަހަރު ފެބްރުއަރީ 7ވަނަ ދުވަހު އޭރުގެ ރައީސް މުހައްމަދު ނަޝީދުގެ ވެރިކަން ނިމުމަކަށްއައީ، މާލެ ސަރަހައްދުގައި ކުރި މުޒާހަރާތަށް ހޫނުވެ، އަމިއްލައަށް އިސްތިއުފާ ދެއްވި ހިސާބުންނެވެ.
ނަމަވެސް ވެރިކަން ވެއްޓުނީ ބަޣާވާތަކުންކަމަށް ބުނެ އޭގެ އަނެއް ދުވަހު ނިކުމެ ތަންތަނުގައި ހުޅުޖަހައި ޓެރަރިޒަމްގެ އަމަލުތައް ހިންގާފައިވެއެވެ.
އެ ދުވަހުގެ އަމަލުތައް ކުށްވެރިކުރައްވައި ޑރ.ޖަމީލް މިއަދު ވިދާޅުވީ ރައްޔިތުންގެ މުދަލަށް ގެއްލުންދިނުމަކީ ސިޔާސީ ފިކުރުގެ ބަޔަކަށް ވެގެން ނުވާނެ ކަމަށެވެ.
ރައީސް ނަޝީދުގެ ވެރިކަން ބަދަލުވި ދުވަހާއި ޖެހިގެން އައި ފެބްރުވަރީ 8ވަނަ ދުވަހު އެމްޑީޕީން ވަނީ ރާއްޖޭގެ އެކި ކަންކޮޅުތަކުގައި ހަމަނުޖެހުން ހިނގާ ދައުލަތާއި ދަރުކާރުގެ މުދަލަށް ބޮޑެތި ގެއްލުންތަކެއް ދީފައެވެ. އެގޮތުން ދައުލަތުގެ މުހިންމު އެތައް ލިޔެކިއުންތަކެއް ދައުލަތުގެ އެތައް އިމާރާތެއްގައި ހުޅުޖެހުމުގެ ސަބަބުން ވަނީ އަނދައިގެންގޮސްފައެވެ.
”އިއާދަނުކުރެވޭ ޝަރުޢީ ތަރިކަ ނެތިގޮސްފި. ޚާއްސަކޮށް އައްޑޫން ނެތިދިޔަ ތަކެތި ކިތަންމެ ޕައުންޑަކުން ވެސް ނުގަނެވޭނެ“ ޖަމީލް ވިދާޅުވިއެވެ.
ރައްޔިތުންގެ މުދަލަށް ގެއްލުންދިނުމަކީ ސިޔާސީ ފިކުރުގެ ބަޔަކަށް ވެގެންނުވާނެ. އިއާދަނުކުރެވޭ ޝަރުޢީ ތަރިކަ ނެތިގޮސްފި. ޚާއްޞަކޮށް އައްޑޫއިން ނެތިދިޔަ ތަކެތި ކިތަންމެ ޕައުންޑަކުންވެސް ނުގަނެވޭނެ. މިޒަޚަމަށް ފަރުވާއެއް ނެތް. މިކަން ހިންގި މީހުން ހަނދާންކޮށް އިތުުރު ފުރުޞަތު ނުދެމާ pic.twitter.com/pK2bywcNQi
— Mohamed Jameel Ahmed (@MJameelAhmed) February 8, 2021
7 ފެބުރުއަރީ 2012 ވަނަ ދުވަހު ރާއްޖޭގައި ހިންގާފައިވަނީ “ބަޢާވާތެއް” ކަމަށް ރައީސް ނަޝީދު ދަނީ ތަކުރާރުކޮށް ވިދާޅުވަމުންނެވެ. އަދި މިކަމުގައި އިސްކޮށް ހަރަކާތްތެރިވެފައިވަނީ ދިވެހި ފުލުހުންކަމަށް ވިދާޅުވެ އެކި ފަހަރުމަތީން ރައީސް ނަޝީދު ވަނީ ވާހަކަ ދައްކަވާފައެވެ.
އެދުވަހުގެ ވެރިކަން ބަދަލުވެފައިވާ ގޮތާއި ގުޅޭގޮތުން އެކުލަވާލި ކޯނީ ރިޕޯޓުގައި ބުނެފައިވަނީ ވެރިކަމުން ރައީސް ނަޝީދު އިސްތިއުފާ ދެއްވާފައިވަނީ އެއްވެސް މަޖުބޫރުކަމެއްނެތި އަމިއްލަ އިޚްތިޔާރުގައިކަމަށެވެ.
