މިއަހަރުގެ ޖުލައި މަހުގެ ނިޔަލަށް ރާއްޖޭގެ އިންފްލޭޝަން ރޭޓު 2.81 އިންސައްތަ މައްޗަށް އުފުލިފައި ވާކަން ތަފާސް ހިސާބުތަކުން ދައްކައިފިއެވެ.
ނޭޝަނަލް ބިއުރޯ އޮފް ސްޓެޓިސްޓިކްސް އިން ނެރުނު ކޮންޒިއުމާ ޕްރައިޒް އިންޑެކްސް (ސީޕީއައި)ގެ ރިޕޯޓު ދައްކާ ގޮތިގައި މިއީ މިދިޔަ ޖޫން މަހާއި އަޅާ ބަލާއިރުގައި 2.4 އިންސައްތަ އިތުރުވުމެކެވެ. ޖޫން މަހުގެ އިންފްލޭޝަން ރޭޓަށް ބަލާއިރު އެމަހުގެ އިންފްލޭޝަން ރޭޓު ހުރީ މައިނަސް 0.41 އިންސައްތައެވެ.
މީގެ އިތުރުން 2019 ވަނަ އަހަރުގެ ޖުލައި މަހާއި އަޅާ ބަލާއިރު މިއަހަރުގެ ޖުލައި މަހުގެ އިންފްލޭޝަން ރޭޓް ވަނީ މައިނަސް 1.10 އިންސައްތަ ދަށްވެފައެވެ.
ޖުލައި މަގު އަގު ތައް އުފުލިފައިވާ ބާވަތްތަކުގެ ތެރޭގައި ކަރަންޓާއި ފެން އަދި އިންޓަނެޓްގެ ޚިދުމަތް ހިމެނެއެެވެ. މީގެ އިތުރުން ތަރުކާރީއާއި ބިހާއި ކިރުގެ ބާވަތްތަކުގެ އަދުތައްވެސް ވަނީ އުފުލިފައެވެ.
އެހެންނަމަވެސް ބައެއް ވައްތަރުގެ މޭވާއާއި ގެދޮރުގެ ކުލި އަދި ކަނޑުމަހާއި އެއްގަމު މަހުގެ އަގުތައް ވަނީ ދަށަށް ގޮސްފައެވެ.
ރާއްޖޭގެ އިންފްލޭޝަން އުފުލިފައިވާއިރު ޑޮލަރުގެ ރޭޓުވެސް ވަނީ ރާއްޖޭގައި އުފުލިފައެވެ. އަދި ބާޒާރުގައި ތަކެތީގެ އަގު އުފުލިފައި ވާއިރު، މުދަލުގެ އަގުވެސް ވަނީ 20-25 އިންސައްތަ އަށް އުފުލިފައި ވާކަމަށް ވިޔަފާރިވެރިން ބުނެއެވެ.