ރާއްޖޭގެ ހުރިހާ ސަރަހައްދަކަށް މިއަދާ މާދަމާވެސް ވަރަށް ވިއްސާރަ ވާނޭ ކަމަށް މޫސުމާބެހޭ ގައުމީ އިދާރާ (މެޓް އޮފީސް) އިން ބުނެ ވައިޓް އެލާޓް ނެރެފި އެވެ. މޫސުމަށް ސަމާލުވުމަށް އިލްތިމާސް ކުރަމުން މެޓް އޮފީހުން ބުނީ ރާއްޖޭގެ އުތުރުގެ އަތޮޅުތަކަށް ގުގުރުމާއި އެކު ބޯކޮށް ވާރޭ ވެހޭނެ ކަމަށާއި ވިލާގަނޑުގައި ގަޑިއަކު 50 މޭލަށް ވައިގަދަވެ ކަނޑުތައް ގަދަ ވާނެކަމަށް ލަފާކުރެވޭ ކަމަށެވެ.
އުތުރަށް ވައިޓް އެލާޓު ނެރެފައިވަނީ މިއަދު ހެނދުނު 07:00 އިން ފެށިގެން މެންދުރު 13:00 އާއި ހަމައަށެވެ.
Alert White for heavy rain, thunderstorms & gusts. pic.twitter.com/FqliGenSrt
— Maldives Meteorology (@MetMaldives) July 20, 2020
ދެކުނަށް ވައިޓް އެލާޓު ނެރެފައިވަނީ މިއަދު ހެނދުނު 06:30 އިން ފެށިގެން 11:30 އާއި ހަމައަށެވެ. މެޓު އޮފީހުން ބުނީ ވައިޓް އެލާޓު ވަގުތުގައި މި ސަރަހައްދަށް ގުގުރުމާއި އެކު ބޯކޮށް ވާރޭ ވެހޭނެ ކަމަށެވެ. އަދި ވިލާގަނޑުގައި ގަޑިއަކު 50 މޭލަށް ވައިގަދަ ވާނެ ކަމަށްވެސް މެޓު އޮފީހުން ވަނީ ބުނެފައެވެ.
ރާއްޖޭގެ ކަނޑުތަށް އާދައިގެ ވަރަކަށް ގަދަވެފައި ވިލާގަނޑުގައި އިތުރަށް ގަދަވާނެ ކަމަށާއި ދިޔަވަރު ބޮޑު ވާ ގަޑިތަކުގައި ބައެއް ރަށްތަކަށް އުދައިގެ އަސަރު ކުރުން އެކަށީގެން ވާކަމަށްވެސް މެޓް އޮފީހުން ވަނީ ބުނެފައެވެ.
މިދިޔަ ހަފުތާ އިން ފެށިގެން ރާއްޖޭގެ ހުރިހާ ސަރަހައްދަކަށް ބޯކޮށް ވާރޭ ވެހި، ބައެއް ރަށްރަށަށް އުދަ އަރާފައިވާއިރު މިހާރު ހިނގަމުން މި ދަނީ ހުޅަނގު މޫސުމުގެ ފުސް ނަކަތެވެ. މި ނަކަތުގައި އުޑުމަތީގައި ފުސް ވިލާ ގިނަވެފައި ބޯކޮށް ވާރޭ ވެހުން ގިނަވާނެ އެވެ. މި ނަކަތް މިމަހުގެ 28 އާ ހަމައަށް ދެމިގެން ދާނެ އެވެ.
