ކޮވިޑް-19 އާ ގުޅިގެން މި ވަބާ ފެތުރެމުންދާ ގޮތުގެ މައުލޫމާތު ދެއްވުމަށް ކޮންމެ ދުވަހަކުވެސް ޓީވީއިން ބައްލު ކުރައްވާ އެއްބޭފުޅަކީ އެޗްޕީއޭގެ މެޑިކަލް އޮފިސަރު ޑރ. ފާތިމަތު ނަޒްލާ ރަފީގެވެ. މި ބަލިމަޑުކަމާބެހޭ ގޮތުން ޑރ.ނަޒްލާ ދެއްވާ މައުލޫމާތާއި އިރުޝާދުތަަކަކީ އެއާމެދު އެއްވެސް ޝައްކެއް އޮތް ކަމެއް ނޫންކަން އެންމެންވެސް ގަބޫލު ކުރާނެއެވެ.
ކޮރޯނާގެ އަޕްޑޭޓް ދެއްވުމަށް ރޭ ޓީވީ މެދުވެރިކޮށް ދެއްކެވި ވާހަކަތަކުގެ ތެރޭގައި އެކަމަނާވަނީ އަތޮޅު ތެރޭގައި ދިރިއުޅޭ މީހުންނަށް ހާއްސަ މެސެޖެއް ދެއްވާފައެވެ. “ގޭގައި ތިއްބަވާ .އެހެން ނޫނީ މާލެއަށް ވީހެން ވެދާނެ.” ކަމުގެ އިންޒާރެވެ.
ޑރ.ނަޒްލާ ވިދާޅުވީ މާލެ ނުރައްކާތެރި ހާލަތަށް ދިއުމުގައި ރައްކާތެރި ކަމުގެ ގޮތުން އަޅަން ސިއްހީ މާހިރުން ދެއްވި އިރުޝާދުތަކަށް ބޯނުލެނބުން ހިމެނޭ ކަމަށެވެ. ގިނަ ބަޔަކު އެއްވެ ނޫޅުމަށާއި، އިޖްތިމާއީ ގައިދުރު ކަމަށް ބާރު އުޅުމަށް ދުރާލާ ދިން ނަސޭހަތްތަކަށް މާލޭގައި ދިރިއުޅޭ ރައްޔިތުންގެ ފަރާތުންއެއްބާރުލުން ދީފައި ނުވާކަމަށް ޑރ. ނަޒްލާ ފާހަގަ ކުރެއްވި އެވެ.
ހަމަ އެގޮތަށް އަތޮޅު ތެރޭގައި ދިރިއުޅޭ ރައްޔިތުންނަށް މިއަދު ދޭން އޮތް ނަސޭހަތަކީ ރަށް ވަކިން ލޮކްޑައުން ކޮށްފައި އޮތުމުގެ މާނައަކީ ބޭރަށް ނުކުމެ އުޅުން ނޫންކަމަށް ހީކޮށްގެން ނުވާނެ ކަމަށެވެ. މިހާރު މުޅި ރާއްޖެއަށް ބަލި ފެތުރިފައިވާކަމުގެ ބިރު އެބައޮތް ކަމަށާއި، ކޮންމެ ރަށެއްގައިވެސް ބަލި ޖެހިފައިވާ މީހަކު ހުރުމަކީ އެކަށީގެންވާ ކަމެއް ކަމަށް ޑރ.ވިދާޅުވި އެވެ.
އެހެންކަމުން މާލެ މިއަދު މިއޮތް ހާލަތަށް ރަށްރަށް ނުދަނީސް އަމިއްލަ ގެއިން ބޭރަށް ނުނިކުމެ ތިބުމަށް އާދޭހާއި އެކު އިލްތިމާސް ކުރައްވާ ކަމަށް ވިދާޅުވި އެވެ.
އަތޮޅު ތެރޭގައި ވެސް މިހާރުވަނީ ޒަރޫރީ ބޭނުމެއްގައިވިޔަސް ހުއްދަ އާއެކު ނޫނީ ރަށްރަށަށް ދަތުރު ނުކުރުމަށާއި މިސްކަިތަށްގޮސް ޖަމާއަތުގައި ނަމާދު ނުކުރުމަށެވެ. އަދި މަގުމަތީގައި މީހުން އެއްވެ އުޅުންވެސް އޮތީ މަނާކޮށްފައި އެވެ.
މާލެ ފިޔަވާ މިހާތަނަށް ކޯވިޑް-19 ޖެހިފައިވާ މީހަކު ފެނިފައިވަނީ ހއ. އުލިގަމުންނެވެ. އެމީހާ އަކީ އޭގެ ކުރިން ޕޮސިޓިވްވި މީހަކާ ގުޅުން ހުރި މީހެއް ނޫންކަމަށް އެޗްޕީއޭއިން ބުނެ އެވެ.
މާލެއިން ޕޮސިޓިވް މީހަކާއި ގުޅުން ނެތް މީހުންނަށް ބަލި ޖެހުންވެސް ދަނީ އެއް ދުވަހުން އަނެއް ދުވަހަށް އިތުރުވަމުންނެވެ.
އިއްޔެ އެކަނިވެސް 17 މީހަކު ބައްޔަށް ޕޮސިޓިވް ވެފައިވާއިރު ކޮންމެ ދުވަހަކު ބަލިޖެހޭ މީހުންގެ އަދަދު ދަށް ނުކުރެވިއްޖެ ނަމަ 14 ދުވަހުގެ ތެރޭގައި ރާއްޖެ މި ބަލީގައި ނުރައްކާތެރި ހާލަތަކަށް ދާނެ ކަމަށް އެޗްޕީއޭއިން ބުނެފައިވެ އެވެ.
