މާލެ ސަރަހައްދުން ރަށްރަށް ދަތުރު ކުރި އެންމެން އެކަހެރިވުމަށް ހެލްތް ޕްރޮޓެކްޝަން އެޖެންސީ (އެޗްޕީއޭ) އިން އަންގައިފިއެވެ.
މިކަމަށް އެދި އެ އެޖެންސީ އިން ނެރުއްވި އެންގެވުމުގައި ބުނެފައިވަނީ މި މަހުގެ 15 ގެ ފަހުން މާލެ، ހުޅުމާލެ، ވިލިމާލެ ގުޅިފަޅު އަދި ތިލަފުށިން ރާއްޖޭގެ އެހެން ރަށަކަށް ދަތުރު ކޮށްފައިވާ މީހަކު ކަމަށްވާނަމަ އެރަށަކަށް ދާ ދުވަހުން ފެށިގެން 14ދުވަސް ވަންދެން އެމީހަކު ދިރިއުޅޭ ތަނެއްގައި ނުވަތަ އެނޫންވެސް ތަނެއްގައި އެކަހެރިވާން އަންގާކަމަށެވެ.
އެޗްޕީއޭގެ މި އެންގުމާ އެއްގޮތަށް އެންގުން ރައްދުވާ ފަރާތްތަކުން އަމަލު ކުރާކަން އެރަށެއްގެ ކައުންސިލާއި ކަމާބެހޭ އެހެނިހެން އިދާރާތަކުން ކަށަވަރުކުރުމަށްވެސް އެޗްޕީއޭ އިން ބުނެފައި ވެއެވެ.
ރާއްޖޭގައި ކޮމިއުނިޓީ ސްޕްރެޑް ފެށިފައިވާ އިރު އިއްޔެއަކީ ރާއްޖެ އިން މިހާތަނަށް އެންމެ ގިނަ ކޭސް ފެނުނު ދުވަސް ކަމަށް އެޗްޕީއޭ އިން ވަނީ ބުނެފައެވެ.
މާލެ ހިމެނޭ ސަރަހައްދު ލޮކްޑައުންއަކަށް ދިއުމުގެ ކުރިން މާލޭގައި ދިރިއުޅުނު ގިނަ ފަރާތްތައް ވަނީ އެކި ރަށްރަށަށް ގޮސްފައެވެ.
މާލެ ސިޓީ ލޮކްޑައުންއަކަށް ގޮސްފައިވަނީ މާލެއިން ފުރަތަމަ ފަހަރަށް މީހަކު ޕޮޒިޓިވްވުމާއި ގުޅިގެން މިދިޔަ ބުދަ ދުވަހުއެވެ.