ލެވިސްތާ އިންޓަރ ރިސޯޓް ފުޓްބޯޅަ މުބާރާތުގެ ސެމީފައިނަލުގައި މިއަދު 2-0 އިން އަމިއްލަފުށި ބަލިކޮށް އަނަންތަރާ ފައިނަލަށް ހިނގައްޖެއެވެ.
މި މެޗުގައި އަނަންތަރާއިން ވަނީ ފުރަތަމަ ހާފްގައި ލަނޑެއްޖަހައި ލީޑުނަގާފައެވެ. ފުރަތަމަ ހާފް ނިމުނީ އިތުރު ލަނޑެއް ދެޓީމަށްވެސް ނުޖެހި އަނަންތަރާ ލީޑުގައި އޮވެއެވެ.
މެޗުގެ މޮޅު ކުޅުންތެރިއަކަށް ހޮވިފައިވަނީ އަނަންތަރާގެ އިސްމާއިލް ޝާކިރެވެ.
ދެވަނަ ހާފުގައި ލަނޑެއް ޖެހޭތޯ އަމިއްލަފުށި މަސައްކަތް ކުރިއެވެ. އެހެންނަމަވެސް އަނަންތަރާއިން ވަނީ އެ ފުރުސަތެއް ނުދީ މިހާފުގެ އިތުރު ވަގުތު ލަނޑެއް ޖަހައި 0-2 އަށް ބަދަލުކޮށްފައއވެ.
މި މުބާރާތުގެ ފައިނަލް މެޗު އޮންނާނީ އަންނަ ހުކުރު ދުވަހު ހަވީރު އޭދަފުށީ ޓާފް ދަނޑުގައެވެ. ފައިނަލުގައި އަނަންތަރާ ވާދަކުރާނީ ސޮނެވާ އާ ދެކޮޅަށެވެ. ސޮނެވާއަކީ މި މުބާރާތުގެ އެއްވެސް މެޗަކުން ބަލި ނުވެ ފައިނަލުގައި ވާދަކުރާ ޓީމެވެ.
ބ. އަތޮޅުގެ ރިސޯޓްތަކުގެ މެދުގައި އެކުވެރިކަން ބަދަހިކޮށް، އިޖްތިމާއީ ރޫހާއި ކުޅިވަރުގެ ރޫހު އާލާކުރުމުގެ މަގްސަދުގައި ބާއްވާ މި މުބާރާތަކީ 2013 ވަނަ އަހަރު އޭދަފުށީ ކޮމްބިނޭޝަން ކަލްބް (ސީސީ) އިން ތައާރަފުކުރި މުބާރާތެކެވެ. ނަމަވެސް 2016 ވަނަ އަހަރުން ފެށިގެން މި މުބާރާތް ބާއްވަމުން އައީ އޭދަފުށީ ޒުވާނުންގެ ކްލަބުންނެވެ. މިއަހަރު މި މުބާރާތް ކުރިއަށް ގެންދަނީ ވެލާ ސްޕޯޓްސް ކްލަބުންނެވެ.
