ބ. އޭދަފުށީގައި ހުރި އޮފީސްތަކަށް ހުޅުވާލައިގެން އޭދަފުށީގައި ކުރިޔަށް ގެންދިޔަ ބެޑްމިންޓަން މުބާރާތުގެ ޗެންޕިއަންކަން ޖެހިޖެހިގެން 3 ވަނަފަހަރަށް ބ. އަތޮޅު ތައުލީމީ މަރުކަޒުން ހޯދައިފިއެވެ.
އޭދަފުށީ ޔޫތް ސެންޓަރުގައި ރޭ ކުޅެވުނު ފޯރިގަދަ މެޗުތަކަކަށްފަހު ޗެންޕިއަންކަން ތައުލީމީ މަރުކަޒުން ހޯދީ ބޭންކް އޮފް މޯލްޑިވްސް އޭދަފުށީ ބްރާންޗް ބަލިކޮށްގެންނެވެ. ރޭ ފައިނަލްގައި ކުޅެވުނު ހަތްމެޗްގެ ތެރެއިން 4 މެޗް ތައުލީމީ މަރުކަޒުން ކާމިޔާބު ކުރިއިރު، ބީއެމްއެލް އަށް ކާމިޔާބުކުރެވުނީ 3 މެޗެވެ.
ފައިނަލް މެޗަށް ފަހު އޮތް މުބާރާތް ނިންމުމުގެ ރަސްމިއްޔާތު ޝަރަފްވެރިކޮށްދެއްވައި ޗެމްޕިއަން ޓީމަށް ޓްރޮފީއާއި މެޑަލް އަދި ފައިސާގެ އިނާމު ހަވާލުކޮށްދެއްވީ ބ. އަތޮޅު ކައުންސިލުގެ ރައީސް މަބްރޫކް ނަސީރެ އެވެ.