ބ. ފުޓްބޯލް ޗެލެންޖް: ފުރަތަމަ ސެމީފައިނަލްގައި އޭދަފުއްޓާ، ކިހާދޫ ބައްދަލުކުރަން ޖެހިއްޖެ

IMG-fb7e7c6eb73d0e8abb34ca04048f894c-V.jpg

ބާ ފުޓްބޯލް ޗެލެންޖްގައި މިއަދު ކިހާދޫއާ ހިތާދޫ ބައްދަލުކުރި މެޗްގެ ތެރެއިން. މިމެޗް 2-1ން ކާމިޔާބުކުރީ ކިހާދޫ / ފޮޓޯ: ވެސްޓް ވިންގް ޖަމްއިއްޔާ

އޭދަފުށީގައި މިހާރު ކުރިޔަށްދާ ބ. ފުޓްބޯޅަ ޗެލެންޖްގެ ފުރަތަމަ ސެމީފައިނަލް މެޗްގައި އޭދަފުއްޓާ، ކިހާދޫ ބައްދަލުކުރަން ޖެހިއްޖެއެވެ.

މިހެން ދިމާވީ މުބާރާތުގައި މިއަދު ކުޅުނު ގްރޫޕް ސީގެ މެޗްގައި ހިތާދޫއަތުން 2-1 ން މޮޅުވެ ހަތް ޕޮއިންޓާއެކު އެގްރޫޕްގެ އެއްވަނަ ހިތާދޫއަށް ލިބުމުންނެވެ. ގްރޫޕް ސީގެ ބާކީ އޮތީ ފެހެންދޫއާ ތުޅާދޫ ބައްދަލުކުރާ މެޗް އެކަންޏެވެ. އެމެޗްގެ ނަތީޖާ ކޮންމެ ގޮތަކަށް ނުކުތަސް ކިހާދޫއަށް ގްރޫޕްގެ އެއްވަނައެއް ނުގެއްލޭނެއެވެ.

މިއަދުގެ މެޗްގައި ފުރަތަމަ ލަނޑުޖަގާ ކުރި ހޯދީ ހިތާދޫ ޓީމުންނެވެ. ލިބުނު ޕެނަލްޓީއަކުން މިލަނޑު ކާމިޔާބުކޮށްދިނީ 23 ވަނަ މިނެޓްގައި އެޓީމްގެ ކެޕްޓަން އަޙްމަދު ހުސެއިން އެވެ. ކިހާދޫގެ ދެލަނޑުވެސް ފެނުނީ ދެވަނަ ހާފްގައެވެ. ފުރަތަމަ ލަނޑު 66 ވަނަ މިނެޓްގައި ސަމީއު ކާމިޔާބުކޮށްދިން އިރު ދެވަނަ ލަނޑު މެޗް ނިމިނިމި އޮއްވާ ކައުންޓާ އެޓޭކެއްގައި ކާމިޔާބުކޮށްދީ ސެމީ ކަށަވަރުކޮށްދިނީ މެޗްގެ މޮޅު ކުޅުންތެރިޔާ ހުސައިން އީމާންއެވެ.

މިއަދުގެ މެޗްގައި މޮޅު ކުޅުންތެރިޔާގެ މަގާމް ހޯދި ކިހާދޫ ޓީމްގެ ހުސައިން އީމާންއަށް ޝަރަފްވެރި މެހްމާން ކުރީގެ ފުޓްބޯޅަ ކުޅުންތެރިޔާ ރަޝާދު ޓްރޮފީ ހަވާލުކޮށްދެނީ / ފޮޓޯ: ވެސްޓްވިންގް ޖަމްއިއްޔާ

މިއަދުގެ މެޗްގައި މޮޅުވެގެން ސެމީގެ ފުރުސަތު ތަނަވަސް ކުރެވެން އޮތް ހިތާދޫ ޓީމްގެ ކޯޗް ވަނީ މެޗްގެ ތެރެއިން ރެފްރީގެ ނިންމުންތަކަށް ވަރަށް ބޮޑަށް ނުރުހުން ފާޅުކޮށްފައެވެ. ހާއްސަކޮށް އެޓީމްގެ ކީޕަރު އޭރިޔާބޭރުން ބޯޅައިގައި އަތްލުމާގުޅިގެން ރަތްކާޑު ދެއްކި މައްސަލާގައެވެ.

ކިހާދޫ ޓީމްގެ މެނޭޖަރ އަދި ކުރީގެ މަޝްހޫރު ފުޓްބޯޅަ ކުޅުންތެރިޔާ އަލީ ނަޖީބް ބުނީ މިއަދުގެ މެޗްގައި ހާސިލް ކުރަން ބޭނުންވި ނަތީޖާ ލިބިއްޖެ ކަމަށާ، އެހެންނަމަވެސް ކުޅުމާމެދު އެހާހިތްހަމަ ނުޖެހޭ ކަމަށެވެ. ނަޖީބް ބުނީ ސެމީގައި އޭދަފުށި ބަލިކުރެވޭނެ ފެންވަރު ކިހާދޫގައި އެބަހުރި ކަމަށެވެ.

“ވަރަށް ބޮޑަށް ތައްޔާރުވާނަން އޭދަފުށީ މެޗަށް. ބަލިނުކުރެވެންވީ ސަބަބެއް ނެތް. ރަނގަޅު ފައިޓެއް ދެވޭނެކަމަށް އުއްމީދުކުރަނީ”

އޭދަފުށި، ކިހާދުއާއެކު ސެމީގައި ވާދަކުރަންޖެހުނީ ބީގްރޫޕްގައި ކުޅުނު ތިންމެޗުން މޮޅުވެ 9 ޕޮއިންޓާއެކު ގްރޫޕްގެ އެއްވަނަ ހޯދައިގެންނެވެ. މިއަދަދަށް މިގްރޫޕުން އިތުރު ޓީމަކަށް ޕޮއިންޓެއް ދެންނުލިބޭނެއެވެ. ސެމީ ފައިނަލްގެ ދެވަނަ މެޗްގައި އެއްކޮޅުން ކެންދޫ ވާދަކުރާއިރު ސެމީގެ އަނެއްޖާގަ ލިބޭނީ ގްރޫޕް ބީ އަދި ސީގެ ޓީމްތަކުގެ ތެރެއިން ދެވަނައަށް އެންމެގިނަ ޕޮއިންޓް ހޯދާ އެއްޓީމެކެވެ. އަމިއްލަ ބާރުގައި މިފުރުސަތު ހޯދުމުގެ ޗާންސް އެންމެ ބޮޑީ ގޮއިދޫއަށެވެ. މާދަމާ މާޅޮހާ ގޮއިދޫ ބައްދަލުކުރާ މެޗުން މޮޅުވެގެން އެޓީމް ސެމީއަށް ދާނެއެވެ.

މިމުބާރާތުގެ ސެމީފައިނަލް މެޗްތައް އޮންނާނީ އަންނަ ހަފްތާގެ ބުދަ އަދި ބުރާސްފަތި ދުވަހުއެވެ.

Share this post

PinIt

‎ޚިޔާލު ފާޅުކުރައްވާ

‎އީމެއިލް އެޑްރެސް ޕަބްލިޝްއެއް ނުކުރާނެ. ‎ކޮންމެހެން ފުރަންޖެހޭ ގޮޅިތައް * ޖަހާފައި


scroll to top