ރޫހާނީ ކަންތައްތަކެއް ހިނގަމުންދާ ކަމަށްބުނެ، ބ.ތުޅާދޫ ސްކޫލްގެ ބެލެނިވެރިންތަކެއް ނިކުމެ އެ ސްކޫލުގައި ތަޅު އަޅުވައިފިއެވެ.
އެ ސްކޫލުގެ މައިގޭޓުގައި ތަޅު އަޅުވާފައިވަނީ މިއަދު ހަވީރު 5:30 ހާއިރު އެވެ.
ބެލެނިވެރިން ތުހުމަތުކުރަނީ އެ ސްކޫލުގައި ހުރި ދުވަސްވީ ގަހެއްގެ ސަބަބުން ދަރިވަރުންނަށް ނޭދެވޭ ރޫހާނީ އަސަރުތަކެއް ފޯރަމުންދާ ކަަމަށެވެ. އެހެންކަމުން އެ ބެލެނިވެރިން ބޭނުންވަނީ އެ ގަސް ކަނޑާލުމަށެވެ.
ތުޅާދޫ ކައުންސިލްގެ ނައިބު ރައީސް ޒާއިދު ރަޝީދު ވިދާޅުވީ މައްސަލަ ހައްލު ނުވަނީސް ސްކޫލް ނުހުޅުވުމަށް ބެލެނިވެރިން ބުނަމުން އަންނަ ކަމަށާ ބެލެނިވެރިން ޑިމާންޑް ކުރަނީ އަލުން ސްކޫލް ހުޅުވަންދެން ކައުންސިލުން ސްކޫލްގެ ތަޅުދަނޑިއާ ހަވާލުވުމަށް ކަމަށެވެ.
ޒާއިދު އިތުރަށް ވިދާޅުވީ ބެލެނިވެރިން ނުކުމެ މިއަދު ސްކޫލް ބަންދުކޮށްފައިވަނީ ބެލެނިވެރިންގެ ބައްދަލުވުމެއްގައި، މީގެ ކުރިން ސްކޫލް ދުވަސްވަރު މިފަދަ ގޮތްތަކެއް ދިމާވި ބެލެނިވެރިންތަކެއް ސަކަރާތް ވުމުން ކަމަށް ޒާއިދް ވިދާޅުވިއެވެ. ސްކޫލްގައި އުޅޭ އިރު ދަރިވަރުން ވަރު ދެރަވުމާއި، ހޭނެތުމަކީ އާންމު ކަމެއް ކަމަށާއި މިއީ ވަރަށް ކުރިން ފެށިގެން ހިނގަމުން އަންނަ ކަމެއް ކަމަށް ޒާއިދު މައުލޫމާތު ދެއްވިއެވެ. އަދި ދަރިވަރުން ގޭގައި އުޅޭއިރު ރަނގަޅު ކަމަށާއި ސްކޫލަށް ދާހިސާބުން މައްސަލަޖެހޭ ކަމަށް ޒާއިދު ވިދާޅުވިއެވެ.
މި މައްސަލައާ ގުޅިގެން ސްކޫލްގެ 90އިންސައްތަ އަށްވުރެ ގިނަ ބެލެނިވެރިން މިހާރުވަނީ ސްކޫލަށާއި ރަށު ކައުންސިލަށް ޕެޓިޝަނެއް ހުށަހަޅާފައި ކަމަށް އޭނާ ވިދާޅުވި އެވެ. މި ޕެޓިޝަނަކީ ސްކޫލްގައި ހުރި ނިކަގަސް ކަނޑާލުމަށް ހުށަހަޅާފައިވާ ޕެޓިޝަނެއް ކަމަށާއި އަންނަ އާދިއްތަ ދުވަހު އެޑިއުކޭޝަން މިނިސްޓަރަށް މި ޕެޓިޝަން ހުށަހަޅާނެކަމަށް ޒާއިދު ވިދާޅުވިއެވެ. ޒާއިދު މައުލޫމާތު ދިން ގޮތުގައި މި ނިކަ ގަހުގައި ރޫހާނީ ކަމެއް އުޅޭ ކަމަށާއި މި ނިކަގަހަށް އެކި ކަންކަން ކޮށްފައިވާ ކަމަށް ބެލެނިވެރިން ތުހުމަތު ކުރެއެވެ.
މީގެ ކުރިންވެސް ބައެއް ރަށްރަށުގެ ސްކޫލްތަކުގައި ހުރި ގަސްތަކުގެ ސަބަބުން ކުދިންނަށް ރޫހާނީ ކަންކަމާއި ކުރިމަތިލާން ޖެހި އެކަން ސަރުކާރުގެ ސަމާލުކަމަށްވެސް ގެނެސްފައިވެ އެވެ.
