ރައީސް ޔާމީންގެ ސަރުކާރުން އޭދަފުށީގައި ގާއިމް ކޮށްދީފައިވާ ފެން ޕްލާންޓުން ރައްކާތެރި ސާފު ބޯފެނުގެ ޚިދުމަތް އަންނަ ހަފްތާގައި ރައްޔިތުންނަށް ފޯރުކޮށްދެވޭނެ ކަމަށް ފެނަކައިން ބުނެފިއެވެ.
ސްރީލަންކާގެ ސެނޮކް ޓްރޭޑް ކޮމްބައިން ޕްރައިވެޓް ލިމިޓެޑާ ސެނަކަ ކުންފުންޏާ ހަވާލު ކޮށްގެން ސަރުކާރާއި އޯޕެކް ފަންޑް ފޯ އިންޓަރ ނޭޝަނަލް (އޯފިޑް) ގެ އެހީތެރިކަމާއެކު އޭދަފުށީގައި އުފައްދާފައިވާ ފެން ޕްލާންޓް، އެންވަޔަރންމަންޓް މިނިސްޓްރީން ފެނަކަ ކޯޕަރޭޝަނާ ހަވާލުކޮށްފައިވަނީ މިމަހުގެ 14 ވަނަ ދުވަހުއެވެ.
ފެނަކަ ކޯޕަރޭޝަނުގެ ޑެޕިއުޓީ ޑިރެކްޓަރ އައިމިނަތު ދުންޔާ ،ޕީއެސްއެމް ނިއުސްއަށް މަޢުލޫމާތުދެމުން ވިދާޅުވެފައިވަނީ ފެން ދޫކުރުމަށް ވާނެޖެހޭ ތައްޔާރީތައް ފެނަކަ އޭދަފުށީ ބްރާންޗުން ކުރަމުން އަންނަ ކަމަށާ މިހާރު ކުރިއަށްދަނީ، ރަޖިސްޓްރޭޝަންގެ މަސައްކަތުގެ އިތުރުން މުވައްޒަފުން ތަމްރީން ކުރުމުގެ މަސައްކަތްކަމަށެވެ.
“މިހާރު ކުރިއަށް ދަނީ ރެޖިސްޓޭޝަންގެ މަސައްކަތް، އެމަސައްކަތް ނިމުނުހާ އަވަހަކަށް ، އަޅުގަނޑުމެން މިބަލަނީ މިއަނަން ހަފްތާއަށް ރެޖިސްޓްރޭޝަން ނިންމާލެވޭތޯ، ހަމަ ނިމުމާއެކު އަންނަ ހަފްތާގެ ތެރޭގައި ފެން ފޯރުކޮށްދެވޭނެ ކަމަށް މިބަލަނީ” އައިމިނަތު ދުންޔާ ވިދާޅުވިއެވެ.
މިމަޝްރޫޢުގެ ދަށުން އޭދަފުށީގައި 16 ކިލޯމީޓަރުގެ ބޯފެނުގެ ވިއުގައެއް ގާއިމުކޮށް ދުވާލަކު 120 ޓަނުގެ ފެން އުފެއްދޭ ވަރުގެ އާރު.އޯ ޕްލާންޓެއް ވަނީ ބަހައްޓާފައެވެ. މިއާއެކު 675 ތަނަށް ވަނީ ސާފު ބޯފެނުގެ ޚިދުމަތް ލިބޭގޮތަށް ގުޅާދީފައެވެ.
ފެން ޕްލާންޓުން ތައްޔާރުކުރާ ފެން ރައްކާކުރުމަށް 1.8 މިލިއަން ލިޓަރ ރައްކާ ކުރެވޭނެ ދެތާނގީއާއި ވާރޭ ފެން ރައްކާ ކުރުމަށް އެއްލައްކަ ލީޓަރުގެ ޓޭންކެއްވެސް ވަނީ ބަހައްޓާފައެވެ.
މިއީ 37 މިލިއަން ރުފިޔާގެ މަޝްރޫއެކެވެ.
