“މިހާރު”ގެ މެނޭޖިން އެޑިޓަރު އަދި “ދޯ” މަޖައްލާގެ އެޑިޓަރު ބ.އޭދަފުށީ މަތިހާ އިސްމާއީލް ނަސީރު، ނޫސްވެރިކަމުގެ ރަން ގަލަން ހާސިލް ކުރައްވައިފި އެވެ.
ރާއްޖޭގެ ނޫސްވެރިކަމަށް 75 އަހަރު ފުރުމުގެ އަލިމަސްޔޫބީލް ފާހަގަ ކުރުމަށާއި ނޫސްވެރިކަމުގެ މިދިޔަ އަހަރުގެ އިނާމުތައް ދިނުމަށް މޯލްޑިވްސް މީޑިއާ ކައުންސިލާއި ހޯމް މިނިސްޓްރީ ގުޅިގެން ރޭ ބޭއްވި ރަސްމިއްޔާތުގައި އިސްމާލަށް ނޫސްވެރިކަމުގެ ރަން ގަލަން ދެއްވީ ހޯމްމިނިސްޓަރ އިމްރާން އަބްދުﷲ އެވެ.
އިސްމާލަށް ރަން ގަލަން ލިބިވަޑައިގެންނެވިއިރު އޭނާ ވަނީ ދިވެހި ނޫސްވެރިކަމުގެ ދާއިރާގައި ތިރީހަށްވުރެ ގިނަ އަހަރު ޚިދުމަތް ކުރައްވާފައެވެ.
އޭނާ ނޫސްވެރިކަމަށް ނުކުންނެވީ މަޝްހޫރު ނޫސް އާފަތިހުގެ ލިއުންތެރިއެއްގެ ގޮތުގައެވެ. އޭރުން ފެށިގެން މިއަދާ ހަމައަށްވެސް އޭނާ ދަނީ އެރޮގުގައި ފިސާރި ސާބިތުކަމާއެކު މަސައްކަތް ކުރައްވަމުންނެވެ.