ބ.ކެންދޫގައި 1997 ވަނަ އަހަރުން ފެށިގެން މިނިސްޓްރީއޮފް އެޑިއުކޭޝަން ގައި ރަޖިސްޓްރީ ކޮށްގެން ހިންގަމުން އަންނަ ހިޔާދޭ އުނގެނުން ޓިއުޝަން ކްލާސް ގެ ނަން “ކީރިތި ގުރުއާނާ ބެހޭ މަރުކަޒުގެ ކެންދޫ ގޮފި ” މިނަމަށްް ބަދަލުކޮށް ކީރިތި ޤުރުއާނާބެހޭ މަރުކަޒުގެ ފަރާތުން އެ ގޮފި އިފްތިތާހު ކޮށްފިއެވެ.
މިދިޔަ ބުރާސްފަތި ދުވަހު މިކަމަށް ޚާއްސަކޮށްގެން އޮތް ރަސްމިއްޔާތުގައި ގޮފި އިފްތިތާހު ކޮށްދެއްވީ ކީރިތި ޤުރުއާން އާ ބެހޭ މަޒުކަޒުގެ ރައީސް އަލްއުސްތާޒު އިބްރާހީމް ރަޝީދު މޫސާ އެވެ. މި ކަމުގެ އެއްބަސްވުމުގައި މި ކްލާހުގެ ފަރާތުން ސޮއިކުރެއްވީ ކްލާހުގެ މަސްއޫލުވެރިޔާ ޢާމިރު ޙަސަންއެވެ. ކީރިތި ޤުރުޢާނާބެހޭ މަރުކަޒު ގެ ފަރާތުން ސޮއި ކުރެއްވީ އެ މަރުކަޒުގެ ރައީސް އަލްއުސްތާޒް އިބްރާހިމް ރަޝީދު މޫސާ އެވެ.
ކެންދޫގައި މެދު ނުކެނޑި 21 އަހަރު ހިންގަމުން އަންނަ މި ކްލާހުގެ އަމާޒަކީ ތަޖުވީދުގެ ހަމަތަކާ އެއްގޮތަށް ޒަމާނީ ފެންވަރެއްގައި ދަރިވަރުންނަށް ކީރިތި ޤުރުޢާން އުނގަންނައިދިނުމާއެކު ﷲގެ މަތިވެރި ކަލާމްފުޅު ކަމުގައިވާ ކީރިތި ޤުރްއާން އުނގަންނައިދިނުން ކަމަށް މި ކްލާސް ހިންގަވަމުން ގެންދަވާ ބޯޑް ގެ އެއްމެންބަރު އަބްދުއްޝަހީދު އަބްދުއްލަތީފް ވިދާޅުވިއެވެ. 
އޭނާ ވިދާޅުވީ މިއަހަރު މިކްލާހުގައި 97 ދަރިވަރުން (ހިތުދަސްކުރާ ކްލާހާއެކު) އެންރޯލްވެ، ޤުރުޢާން އުނގެނެމުންދާ ކަމަސާއި ހަމައެހެންމެ ބޮޑެތިމީހުންނަށް ޚާއްސަކޮށް އަޤީދާ، ޢަރަބިބަސް ފަދަ ކްލާސްތައް ހިންގަމުން ގެންދާ ކަމަށެވެ. މީގެ އިތުރުން ތަފާތު އެކިއެކި މުބާރާތްތަކާއި ޕްރޮގްރާމްތައް މިކުލާހުގެ ދަރިވަރުންނާއި ބެލެނިވެރިންނަށް ހާއްސަކޮށްގެން ހިންގަމުން ދާކަމަށްވެސް ވިދާޅުވިއެވެ. ( ޙަފްލަލް މަވާހިބު ) ( ޙަފްލަލް މަޢުރަޒު ) (ޤްރުޢާން މުބާރާތްތައް) (ހިފްޡް ކްލާސް) (ނަމާދު މަހާސިންތާ)
އަމިއްލަ މުޤައްރަރަކަށް ކިޔަވައިދެމުން އަންނަ މިކްލާހުގެ ކާމިޔާބީތަކުގެ ތެރޭގައި 2016 ވަނަ އަހަރުން ފެށިގެން ޤުރްއާން ހިތުދަސްކޮށްދޭ ކުލާސްތައްވެސް މިކުލާހުގައި ކުރިއަށްގެންދެވެއެވެ .ނަތީޖާ އެއްގެ ގޮތުން 2010 ވަނަ އަހަރު ކީރިތި ޤުރުޢާނާބެހޭ މަރުކަޒުގެ މުގައްރަރުގެ އިމްތިހާނުތަކުގައި ބައިވެރިވެ ރަނގަޅު ނަތީޖާތަކެއް ދަރިވަރުން ހާސިލްކޮށްފައިވެއެވެ.
އަށް މުދައްރިސުންނާއެކު ދަރިވަރުންނަށް އުނގަންނައިދިނުމުގެ މަސައްކަތް ކުރަމުންދާ މި ކްލާހުގައި ލެވެލް އެކެއްގެ ފަސް ކްލާހާ ލެވެލް ދޭއްގެ ހަތަރު ކްލާހާ ލެވެލް ތިނެއްގެ ދެ ކްލާސް ހިމެނޭ ގޮތުން އުނގެނެމުންދެއެވެ. ހަމައެހެންމެ 05 ސެޕްޓެމްބަރ 2018 އިން ފެށިގެން އަށް ޖަމާޢަތްތެރިން ތަމްރީނުކުރުމުގެ ޕްރޮގްރާމެއް ވެސް ދަނީ ކުރިއަށް ގެންދަމުންނެެވެ.
މި ކްލާހުން މިވަގުތު ކުރިއަށް ގެންދިއުމަށް ހަމަޖެހިފައިވާ ކޯސްތަކަށް ބަލާއިރު ޤިރާއަތު ލެވެލް 1، 2، 3 އަދި ޖަމާޢަތްތެރިން ތަމްރީނުކުރާ ކޯސްތަކުގެ އިތުރުން އަވަސް މުސްތަޤުބަލެއްގައި އިމާމުކޯސް އަދި ޤާރީ ކޯސްތައް ޑިޕްލޮމާ ލެވެލްއާ ހަމައަށް ކުރިއަށް ގެންދިއުމަށް ހަމަޖެހިފައިވެއެވެ.
