ތާރު އަޅައިގެން ރަނގަޅު ފެންވަރަކަށް ހަދަމުން ގެންދާ އޭދަފުށީގެ 17 މަގުގެ މަސައްކަތް ކުރިއަށް ދާއިރު އިތުރު މަގު ތަކެއްގައި ތާރު އެޅުމާމެދު ސަރުކާރާ އެކު މަޝްވަރާ ކުރަމުން ދާކަމަށް އޭދަފުށީ ކައުންސިލްގެ ރައީސް ތޮލާލު އަބްދުއްރަހްމާން ވިދާޅުވެއްޖެއެވެ.
ތޮލާލް ވިދާޅުވީ ރައްޔިތުންގެ އެދުމާއެކު އިތުރު މަގުތަކެއްގައި ތާރު އަޅައިދިނުންއެދި ކުރެވެމުންދާ މަޝްވަރާ ކާމިޔާބުވާނެކަމަށް ވަރަށް ބޮޑަށް އުއްމީދު ކުރައްވާކަމަށާއި އަންނަ ހަފްތާގައި މިކަމަށް ހައުސިން މިނިސްޓްރީން ގޮތެއް ނިންމަވާނެކަމުގެ މައުލޫމާތު ލިބިފައިވާ ކަމުގައެވެ.
“މުހިއްމު ބައެއް މަގުތައް އިތުރުކުރެވޭތޯ އަޅުގަނޑުމެން މަޝްވަރާކުރަމުންމިދަނީ. ވަރަށް ބޮޑަށް އުއމްީދުކުރެވޭ ހައުސިންއިން މިކަމަށް އާބަސް ބުނާނެކަމަށް” ތޮލާލް ވިދާޅުވިއެވެ.
އޭދަފުށީގެ 17 މަގު ރަނގަޅު ފެންވަރަކަށް ހެދުމުގެ މަސައްކަތް ހައުސިން މިނިސްޓްރީ އިން މޯލްޑިވްސް ރޯޑް ޑިވެލޮޕްމަންޓް ކޯޕަރޭޝަން (އެމްއާރްޑީސީ ) އާ ހަވާލުކުރައްވާފައިވަނީ 33 މިލިއަން ރުފިޔާ އަށް އެއް އަހަރު ދުވަހުގެ ތެރޭގައި މަސައްކަތް ނިންމާ ގޮތަށެވެ..
އެހެން ނަމަވެސް 15ޖޫން 2015ގައި ހަވާލު ކުރި މިމަސައްކަތް އޭދަފުށީގައި ފަށާފައިވަނީ މި ދިޔަ އަހަރުގެ އޮކްޓޯބަރ މަހުއެވެ.
މަގު ހެދުމުގެ ގޮތުން މިހާރު އޭދަފުށީގައި ކުރެވެމުން ދަނީ މަގުތަކުގެ ޕޭމެންޓުގައި ގާއެތުރުމުގެ މަސައްކަތާއި ޖަންކްޝަންތައް ބެހެއްޓުމާއި ހޮޅި ވަޅުލުމުގެ މަސައްކަތެވެ.
