ބ.ތުޅާދޫ ކައުންސިލް އިދާރާގައި ބަހައްޓާފައިހުންނަ އަޑުގަދަކުރާއިން އިސްތިހާރު، އިއުލާނު، އެނައުންސްމަންޓްފަދަ ތަކެތި ގޮވާދިނުމަށް އަކުރަކަށް 25 ލާރި ނެގުމަށް ތުޅާދޫ ކައުންސިލުން ނިންމައިފިއެވެ.
ތުޅާދޫ ކައުންސިލުން ބުނީ ހުށަހަޅާ ތަކެތި ގޮވާދިނުމަށް ހަމަޖެހިފައި ވަނީ ހުށަހަޅާ ޓެކްސްޓްގައިވާ ކޮންމެ އަކުރަކަށް 25 ލާރި ރޭޓުން ފައިސާ ކައުންސިލަށް ދެއްކުމުންކަމަށް އެ އުޞޫލުގައި ބަޔާން ކޮށފައިވެއެވެ. އަދި މިފަދަ ތަކެތި ގޮވާ ދޭނީ ގިނަވެގެން 05 ފަހަރުއެވެ.
ނަމަވެސް މިއުޞޫލުގައި ދައުލަތުގެ މުއައްސަސާތަކުންނާއި، %100 ރައްޔިތުން ހިއްސާވާ ކުންފުނިތައް ނުހިމެނޭކަމަށް އެކައުންސިލުން ބުނެއެވެ. އެފަދަ ތަނަކުން ގޮވުމަށް ގެންނަ ލިޔުންތައްކަށް ފައިސާއެއް ނުނަގާނެއެވެ. އަދި މީހެއްގެ މުދަލަށް ފުރާނައަށް ގެއްލުމެއްވާފަދަ ކަންކަމުގައާއި، ޤުދުރަތީ އަދި މޫސުމީގޮތުން ދިމާވާ ނުރައްކާތެރި ހާލަތްތަކުގައި އަޑުގަދަކުރާއިން ގޮވާދިނުމަށް އެދޭ ތަކެއްޗަށްވެސް ފައިސާއެއް ނުނަގާނެއެވެ.
ތުޅާދޫ ކައުންސިލުން އަޑުގަަދަކުރާ ބޭނުންކުރާނެ އުސޫލުތައް ފާސްކޮށް ގަވާއިދެއް ހެދިއިރު މިއީ ބ. އަތޮޅުގެ ކައުންސިލަކުން މިފަދަ ކަމަކަށް ގަވާއިދެއް ހެދި ފުރަތަމަ ފަހަރުކަމަށް މައުލޫމާތު ލިބެއެވެ. އަތޮޅުގެ ރަށްރަށުގެ ރައްޔިތުންނަށް އަންގަންޖެހޭ މުހިއްމު އެންގުންތައް އެންގުމަށް ބ. އަތޮޅުގެ ގިނަ ރައްރަށުގެ ކައުންސިލްގެ އިމާރާތުގައި އަޑުގަދަކުރާއެއް ހަރުކޮށްފައިހުރެއެވެ.