ރާއްޖެ ހިމެނޭ ގޮތަށް ބައެއް ގައުމުތަކުގެ ޓޫރިސްޓުން ތައިލެންޑުގައި ވިސާއާ ނުލާ ތިބެވޭ މުއްދަތު 30 ދުވަހަށް އިތުރުކުރަން ނިންމައިފި އެވެ.
މިހާރު ދިވެހިންނަށް ވިސާއާ ނުލާ ތައިލޭންޑްގައި ތިބެވެނީ 15 ދުވަހަށެވެ.
ނަމަވެސް އެ މުއްދަތު މިހާރު 30 އަށް އިތުރު ކުރަން އެ ގައުމުގެ ކެބިނެޓުން އެގޮތަށް ނިންމި އިއްޔެ އެވެ. އެގޮތުން 93 ގައުމެއްގެ ޓޫރިސްޓުންނަށް ވިސާއާ ނުލާ ތިބެވޭ ގޮތަށް ދޭ 60 ދުވަހުގެ މުއްދަތު އުވައިލަން ނިންމާފައިވެ އެވެ. އެގޮތަށް ނިންމީ ވިސާއާ ނުލާ ދޭ މުއްދަތުގެ ބޭނުން ނާޖާއިޒު ގޮތުގައި ހިފައި، ގާނޫނާ ހިލާފު ކަންކަން ކޮށް، އެގައުމުގެ ސަލާމަތާއި ރައްކާތެރިކަމަށް ހުރަސް އެޅޭތީ ކަމަށް ބުނެފައިވެ އެވެ.
ތައިލެންޑް ސަރުކާރުގެ ތަރުޖަމާނުގެ ނައިބު ޕްލޮއިތަލޭ ލަކްސަމީސެންޗަން ވިދާޅުވި ގޮތުގައި، ވިސާއާ ނުލައި އެތެރެވޭ ގައުމުތަކުގެ އަދަދު ވަނީ 93 އިން 59 އަށް މަދުކޮށްފައެވެ. ނަމަވެސް ބަލްގޭރިއާ، ކްރޮއޭޝިއާ، ސައިޕްރަސް، އިންޑިއާ، މޯލްޓާ އަދި ދިވެހިރާއްޖެ ހިމެނޭހެން ހަ ގައުމަކަށް ވަނީ ވިސާގެ އިތުރު އިނާޔަތްތަކެއް ދީފައެވެ. މީގެ އިތުރުން ޔޫރަޕިއަން ޔޫނިއަންގެ 27 ގައުމަށްވެސް ވަނީ އެއްހަމައެއްގައި ވިސާގެ އުސޫލުތައް ހަމަޖައްސާފައެވެ.
މި ބަދަލާއެކު އެންމެ ބޮޑު ފައިދާއެއް ކުރާނެ އެއް ބަޔަކީ އިންޑިއާގެ ދަތުރުވެރިންނެވެ. މީގެ ކުރިން އޮން-އެރައިވަލް ވިސާ ނަގަން ޖެހުނު ނަމަވެސް، މީގެ ފަހުން އިންޑިއާގެ ރައްޔިތުންނަށް 30 ދުވަހުގެ ވިސާ-ފްރީ އެންޓްރީ ލިބޭނެއެވެ. ޓޫރިޒަމް އެންޑް ސްޕޯޓްސް މިނިސްޓަރު ސޫރަސަކް ފަންޗަރޮއެންވޮރަކުލް ވިދާޅުވީ، މީގެ ކުރިން އިންޑިއާގެ ފަތުރުވެރިން އޮން-އެރައިވަލް ވިސާ ނަގަން ޖެހުމުން އެ ގައުމުން އަންނަ ފަތުރުވެރިންގެ އަދަދު %20 ދަށަށް ދިޔަ ކަމަށެވެ. އެހެންކަމުން، މިއީ ފަތުރުވެރިކަން ކުރިއެރުވުމަށާއި އިމިގްރޭޝަން ކޮންޓްރޯލް ހަރުދަނާކުރުމާ ދެމެދު ގާއިމުކުރެވުނު މުހިންމު ބެލެންސެކެވެ.
މީގެ އިތުރުން، ސީޝެލްސް އަދި މޮރިޝަސްގެ ރައްޔިތުންނަށް 15 ދުވަހުގެ ވިސާ-ފްރީ އެންޓްރީ ދިނުމަށާއި، އަޒަރުބައިޖާން، ބެލަރޫސް އަދި ސާބިއާގެ ރައްޔިތުންނަށް އޮން-އެރައިވަލް ވިސާ ލިބޭ ގޮތަށްވެސް ވަނީ ނިންމާފައެވެ.
