ދިވެހި ރާއްޖޭގެ ދަރަނި 74 ބިލިޔަނަށް އެރިއިރު އަތޮޅު ތެރޭގެ ގިނަ ރައްޔިތުން އަދިވެސް ފެންވަރަނީ ނަޖިސް ފެނުން ކަމަށް ވިދާޅުވެ ބ.ކެންދޫ ދާއިރާގެ މަޖިލިސް މެންބަރު އަލީ ހުސެން ކަންބޮޑުވުން ފާޅު ކުރައްވައިފި އެވެ.
އަލީ އިއްޔެ ކުރެއްވި ޓްވީޓެއްގައި ވިދާޅުވީ 74 ބިލިޔަން ރުފިޔާގެ ދަރަނި ދިވެހިންގެ ބޮލުގައި އެޅުނު އިރު އަތޮޅު ތެރޭގެ ގިނަ ރައްޔިތުން އަދިވެސް ނަޖިިސްފެނުން ފެންވަރަން ޖެހިފައިވުމުން އެހުރިހައި ފައިސާ ޚަރަދުކުރީ އެންމެ ރަނގަޅަށް ނޫންކަން ސާބިތުވާ ކަމަށެވެ.
74 ބިލިޔަން ރުފިޔާގެ ދަރަނި ދިވެހިންގެ ބޮލުގައި އެޅުނު އިރު އަތޮޅު ތެރޭގެ ގިނަ ރައްޔިތުން އަދިވެސް ނަޖިިސްފެނުން ފެންވަރަން ޖެހިފައިވުމުން އެހުރިހައި ފައިސާ ޚަރަދުކުރީ އެންމެރަނގަޅަށް ނޫންކަން ސާބިތުވޭ.
— Ali Hussain (@AleeVoice) September 7, 2020
މި އަހަރުގެ ޖޫން މަހުގެ ނިޔަލަށް ރާއްޖޭގެ ދަރަނީގެ އަދަދު 73.9 (ގާތްގަނޑަކަށް 74) ބިލިއަން ރުފިޔާގައި ހުރިކަމަށް ފިނޭންސް މިނިސްޓްރީގެ ތަފާސްހިސާބުތަކުން ވަނީ ދައްކާފައެވެ.
މިދިޔަ ބުރާސްފަތު ދުވަހު ފިނޭންސުން އާއްމު ކުރި ތަފާސްހިސާބު ތަކުގައި ވަނީ ރާއްޖޭގެ ޖުމްލަ ދަރަނި ހުރީ ޖީޑީޕީއާ އަޅާބަލާއިރު 108 ޕަސެންޓުގައެވެ. އެއީ މި އަހަރުގެ ފުރަތަމަ ކުއާޓަރާ އަޅާ ބަލާއިރު ހަ ޕަސެންޓުގެ އިތުރުވުމެކެވެ.
ދައުލަތުގެ ދަރަނި ބޮޑުވެގެން ދިޔައިރު މި ސަރުކާރުން އަތޮޅުތެރޭގައި އެކަށީގެންވާ ވަރަށް ތަރައްގީގެ މަޝްރޫއުތައް ކުރިއަށް ނުގެންދާތީ ރައްޔިތުންގެ ނުރުހުމާއި ފާޑުކިއުން ސަރުކާރަށް ވަނީ އަމާޒުވެފައެވެ.
