ބ.ގޮއިދޫގައި ފުލުހުންގެ ހިދުމަތް ދޭން ފެށުމުގެ ގޮތުން ގޮއިދޫ ޕޮލިސް ޕޯސްޓް މިއަދު ހުޅުވައިފި އެވެ. އެވެ.
މި ޕޮލިސް ޕޯސްޓް އިފްތިތާހު ކުރުމުގެ ގޮތުން ހޯމް މިނިސްޓަރު އިމްރާން އަބްދުﷲ މިއަދު ވަނީ ގޮއިދުއަށް ވަޑައިގެން ހިދުމަތް ފައްޓަވައިދެއްވާފައެވެ.
މިނިސްޓަރުގެ އިތުރުން ފުލުހުންގެ އިސް ބައެއް އޮފިސަރުންނާއި ގޮއިދޫ ކައުންސިލްގެ އިސް ބޭފުޅުން މި ރަސްމިޔާތުގައި ބައިވެރިވެވަޑައިގެންނެވި އެވެ.
މި ރަސްމިއްޔާތުގައި މިނިސްޓަރު އިމްރާން ވިދާޅުވީ ރައްޔިތުންނަށް އަމާންކަމާއި ރައްކާތެރިކަން ކަށަވަރުކޮށްދީގެން މެނުވީ ރައްޔިތުންނަށް އިގްތިސާދީ ފުދުންތެރިކަމާއި، އިޖުތިމާއީ ދުޅަހެޔޮކަން ނާންނާނެ ކަމުގައެވެ. އަދި މުޅި ރާއްޖެއަށް ވިސްނައި ފިކުރު ހިންގައިލާއިރު ރާއްޖޭގެ ރަށްރަށުގެ މީހުންގެ ދިރިއުޅުމާއި ސަގާފަތާއި ވައްޓަފާޅިއަށް ބޮޑެތި ބަދަލުތަކެއް އައިސްފައިވާކަން ފާހަގަކުރައްވައި މީގެ އެތައް ދުވަހެއް ކުރިން ރާއްޖެއަށް ދިމާވެފައިވާ އެންމެ ނުރައްކާތެރި އެއް ވަބާ ކަމުގައިވާ މަސްތުވާތަކެތީގެ އަސަރު މީހުން ދިރިއުޅޭ ކޮންމެ ރަށަކަށް ކޮށްފައިވާކަން ފާހަގަކުރެއްވިއެވެ.
އިމްރާން ވިދާޅުވީ އެކަމުގެ ފަހަތުގައި ތިބި ނުރައްކާތެރި މީހުން އެ ކުރާ މަސައްކަތަކީ ހުރިހާ މީހުންވެސް އެކަމަށް ވިސްނައިގެން ފުލުހުންގެ ހިދުމަތް ބައްޓަންކުރަންޖެހޭ މަސައްކަތެއް ކަމަށާއި، ސަލާމަތާއި ރައްކާތެރިކަން ރައްޔިތުންނަށް ކަށަވަރުކޮށްދެވޭނީ އެގޮތުން ކަމުގައި ވިދާޅުވިއެވެ.
