15 ދަރިވަރުންނާއި 4 ޓީޗަރުންނާއެކު ފޭދޫ ސްކޫލްގެ ޓީމެއް ތަޖްރިބާ ހޯދުމުގެ ދަތުރެއްގައި ބ. އަތޮޅަށް އަތުވެއްޖެއެވެ.
ބ. އަތޮޅަޑް ކުރާ ދަތުރުގެ ބޭނުމަކީ ބީޓެކް އާޓް އެންޑް ޑިޒައިން ހަދާ ދަރިވަރުންގެ އެސައިންމެންޓް ހެދުމަށް ބޭނުންވާ މައުލޫމާތުގެ އަމަލީ ތަޖުރިބާ ހޯދުންކަމުގައި ފޭދޫ ސްކޫލުން ބުނެއެވެ.
ފޭދޫ ސްކޫލުން ބުނީ ބ. އަތޮޅަށް ދާން ނިންމީ އެ އަތޮޅަކީ ދަރިވަރުން އެސައިންމެންޓް ހަދަން ބޭނުންވާ ތަފާތު މަސައްކަތްތެރިކަމުގެ މައުލޫމާތު އެއް ތަނަކުން ލިބޭނެ އަތޮޅަކަށްވާތީ ކަމަށެވެ.
މި ޓީމް ބ. ކިހާދޫ، ތުޅާދޫ، ދަރަވަންދޫ، ކުޑަރިކިލު، އޭދަފުށީގެ އިތުރުން ސޮނެވާފުއްޓަށް ވެސް ޒިޔާރަތް ކުރަން ހަމަޖެހިފައިވެއެވެ.
ފޭދޫ ސްކޫލުން ބުނީ ޒިޔާރަތް ކުރާ ކޮންމެ ރަށަކުން ވެސް ތަފާތު މަސައްކަތްތެރިންނާއި ދަރިވަރުންނާ ބައްދަލު ކުރާނެ ކަމަށެވެ.
ބ. އަތޮޅުގެ ތަޖްރިބާ ދަތުރު ނިންމާލާފައި ފޭދޫ ސްކޫލް ޓީމް އައްޑޫސިޓިއަށް ދިއުމަށް ހަމަޖެހިފައިވަނީ މި މަހުގެ 30 ގައެވެ.
