ޒޯން ޗެމްޕިއަންޝިޕް ފުޓްބޯޅަ މުބާރާތް ބޭއްވުމަށް އޭދަފުށްޓާއެކު އިތުރު ފަސް ރަށަކުން ޝަޢުގުވެރިކަން ފާޅުކޮށްފައިވާކަމަށް ފުޓްބޯލް އެސޯސިއޭޝަން އޮފް މޯލްޑިވްސް (އެފްއޭއެމް )އިން ބުނެފިއެވެ.
މިރަށްތަކުގެ ތެރޭގައި ހިމެނެނީ އޭދަފުށި، ހދ.ކުޅުދުއްފުށި، ގދ.ތިނަދޫ، ދ.ކުޑަހުވަދޫ ، އައްޑޫސިޓީ ފޭދޫ ، ތ.ތިމަރަފުށި ކަމަށް އެމްއޭއެމްގެ ޖެނެރަލް ސެކްރެޓަރީ ހުސޭން ޖަވާޒު ވިދާޅުވިއެވެ.
ޖަވާޒް ވިދާޅުވީ ޒޯން ޗެމްޕިއަންޝިޕް މުބާރާތް ކުރިއަށް ދާނީ ދެ ރަށެއްގައިކަމަށާއި އެ ދެރަށް ކަނޑައެޅުމަށްޓަކައި މިހާރުވެސް އެފްއޭއެމްގެ އޮފިޝަލުން ބައެއް ރަށްތަކަށްގޮސް ބަލާފައިވާކަމަށެވެ. މުބާރާތް ބާއްވާނެ ރަށްތައް ނިންމާއިރު، ރަށްރަށުން ހުށައަޅާފައިވާ ބިޑަށް ވަރަށް ބޮޑަށް ބަލާނެކަމަށާއި އެފްއޭއެމްއިން ބޮޑަށް އިސްކަން ދޭނީ ދަނޑުގެ ހާލަތާއި ކުޅުންތެރިންގެ އެކޮމޮޑޭޝަންގެ ކަންތަށްތަކާއި ކެއުމުގެ ހާލަތަށް ކަމުގައި ޖަވާޒް ވިދާޅުވިއެވެ.
މި މެޗްތައް އޭދަފުށީގައި ބާއްވައިދިނުމަށް އޭދަފުށީ ކައުންސިލުން އެފްއޭއެމް އަށް ޕްރޮޕޯސަލް ހުށަހަޅާފައިވަނީ މި މަހުގެ 5 ގައެވެ.
އޭދަފުށި ކައުންސިލްގެ ރައީސް ތޮލާލު އަބްދުއްރަހްމާން ވިދާޅުވީ ގިނަ ކަންތައްތަކެއް ކޮށްދޭގޮތަށް ކައުންސިލްގެ ފަރާތުން ޕްރޮޕޯސަލް ހުށަހެޅީ މުބާރާތް އޭދަފުށީގައި ބާއްވަން ރަށުގެ ގިނަ ބަޔަކު ބޭނުންވާނެކަމަށް ގަބޫލުކުރެވޭތީ ކަމަށެވެ.
ސަބަބެއްކަމުގައި އޭނާ ފާހަގަކުރެއްވީ މި ދިޔަ ދެއަހަރުވެސް އޭދަފުށި ޓީމް ދާންޖެހުނީ ރަށުން ބޭރަށް ކަމަށާއި އެއީ އެހާ ފަސޭހަކަމެއް ނޫންކަމުގައެވެ.
އިތުރަށް ތޮލާލް ވިދާޅުވީ މުބާރާތުގައި ބައިވެރިވާ ރަށްރަށުގެ ސަޕޯޓަރުން މެޗްތައް ބަލަން ގިނަ އަދަދަކަށް އަންނާނެކަމަށް ލަފާކުރާ ކަމަސާއި އެހެންކަމަށްވާނަމަ އެއީ ރަށުގެ ވިޔަފާރިތަކަށްވެސް ލިބޭނެ ކުރިއެރުމަކަށް ވާނެކަމުގައެވެ.
ޒޯންތަކުގެ ޗެމްޕިއަނުންގެ މެދުގައި ކުޅެވޭ ޒޯން ޗެންޕިއަންޝިޕް މުބާރާތް ބާއްވާނެ ރަށްތައް ފައިނަލް ކުރެވޭވަރުވާނީ ހަފްތާއެއްހާ ދުވަސް ފަހުންކަމަށް ޖަވާޒް ވިދާޅުވިއެވެ.
ޒޯން ޗެމްޕިއަނުންގެ މެދުގައި ކުޅެވޭ މިމުބާރާތުގައި ވާދަކުރާ ރަށްތަކަކީ ޒޯން 1ގެ ޗެމްޕިއަން ހދ. ކުޅުދުއްފުށި، ޒޯން 2ގެ ޗެމްޕިއަން ށ.މިލަންދޫ. ޒޯން 3ގެ ޗެމްޕިއަން ބ.އޭދަފުށި، ޒޯން 4ގެ ޗެމްޕިއަން އއ.މާޅޮސް، ޒޯން 5ގެ ޗެމްޕިއަން ދ.ކުޑަހުވަދޫ، ޒޯން 6ގެ ޗެމްޕިއަން ތ.އަތޮޅު ތިމަރަފުށި، ޒޯން 7ގެ ޗެމްޕިއަން ގދ.ތިނަދޫ އަދި ޒޯން 8ގެ ޗެމްޕިއަން އައްޑޫ ސިޓީ ފޭދޫ އެވެ.
