މިއަހަރުގެ ރަމަޟާންމަހު މާޅޮހު ކައުންސިލްގެ ފަރާތުން އެރަށު ރައްޔިތުންނަށް 500 ކިލޯ ފިޔާ ބެހުމަށް ނިންމައިފިއެވެ.
މާޅޮހު ކައުންސިލުން ބުނީ 500 ކިލޯ ފިޔާބަހަން ނިންމީ 100 ގޭގެ މަގުން ކޮންމެ ގެއަކަށް 5 ކިލޯ ފިޔާ ލިބޭގޮތަށް ކަމަށެވެ. އެކައުންސިލްގެ ރައީސް އަބްދުﷲ ޝުޖާއު ވިދާޅުވީ މިއީ ކޮންމެ އަހަރަކުވެސް ރޯދަމަހާ ދިމާކޮށް އެކައުންސިލްގެ މެމްބަރުންގެ ފަރާތުން ރަށުގެ ރައްޔިތުންނަށް ދެމުންގެންދާ ހައިރާތެއް ކަމަށާ، މިއަހަރުގެ ރޯދަ ހަދިޔާ ދެދުވަހެއްގެ ތެރޭގައި ރަށުގެ ހުރިހާ ގެއަކަށް ބަހާ ނިމޭނެކަމަށެވެ.
“މިދިޔަ 3 އަހަރުވެސް އަޅުގަނޑުމެން މިދިޔައީ ރޯދަ ހަދިޔާގެ ގޮތުގައި ކޮންމެވެސް ހައިރާތެއް ރަށުގެ ގޭގެއަށް ދެމުން. އެގޮތުން މިއަހަރުވެސް މިދެނީ ފިޔާ. އެއީ ކޮންމެ ގެއަކަށް 5 ކިލޯ. މާދަމާ ހަވީރު ފިޔާ ބަހަން ފެށޭނެކަމަށް މިބަލަނީ” ޝުޖާއު ވިދާޅުވިއެވެ.
އޭނާ ވިދާޅުވީ ރޯދަ ހަދިޔާ ކޮންމެ އަހަރަކުވެސް ރޯދަމަހުގެ ކުރިން ދެމުން އައި ނަމަވެސް މިއަހަރު ހަދިޔާ ދިނުން ލަސްވީ ބާޒާރުން ފިޔާ ގަންނަން ނުލިބިގެން ކަމަށާ، ފިޔާ ލިބޭވަރުވީ އިއްޔެ ކަމަށެވެ.
600 އަށްވުރެ ބޮޑު އާބާދީއެއް ހިމެނޭ މާޅޮހު ރައްޔިތުންނަށް އެރަށު ކައުންސިލުން ރޯދަ ހަދިޔާގެ ގޮތުގައި 2014 ވަނަ އަހަރު އޮރެންޖު ބަހާފައިވެއެވެ. އަދި 2015 ވަނަ އަހަރު ބިސްޓްރޭއެއް ކޮންމެ ގެއަކަށް ބެހިއިރު، މިދިޔަ އަހަރު ކޮންމެ ގެއަކަށް ދީފައިވަނީ 5 ކިލޯ ފިޔާއެވެ.