މިއީ ބ. އަތޮޅުގެ އާންމު ރައްޔިތުންގެ ފަރާތުން މިނޫހަށް ލިބޭ ސުވާލުތަކުގެ ތެރެއިން ކަމާބެހޭ އިދާރާތަކުން މައުލޫމާތު ހޯދައި، ކޮންމެ ހޮނިހިރު ދުވަހަކު ގެނެސްދިނުމަށް ހަމަޖެހިފައިވާ ކޮލަމެކެވެ. މިހަފްތާގެ ސުވާލުތައް ހާއްސަ ކޮށްލަނީ ބ. އަތޮޅު ކައުންސިލަށެވެ.
ސުވާލު: އަތޮޅަށް ރީތިނަން ހޯދަދީފައިވާ ފަރާތްތަކަށް އަމާޒުކޮށްގެން ބޭއްވި ރަަންނާ އެވޯޑަށް ކިހާ ފައިސާއެއް ހަރަދުވިތޯ؟ ފައިސާ ހަރަދުކުރީ ކޮން ބަޖެޓަކުންތޯ؟ ތަފްސީލެއް ދެއްވަފާނަންތޯ؟
ޖަވާބު: އަތޮޅު ކައުންސިލުން އަތޮޅަށް ރީތިނަން ހޯދާދީފައިވާ ފަރާތްތަކަށް އަމާޒުކޮށްގެން ބޭއްވި “ރަންނާ އެވޯޑް” އަށް ޚަރަދު ކުރެވުނީ އަތޮޅު ކައުންސިލްގެ ބަޖެޓުންނާއި، ކައުންސިލްގެ މާލިއްޔަތުންނެވެ. މިގޮތުން ރައްނާ އެވޯޑަށް 298240.40 (ދެލައްކަ ނުވަދިހަ އަށްހާސް ދުއިސައްތަ ސާޅީސްލާރި) ގެ އަދަދުގެ ބަޖެޓެއް ކައުންސިލްގެ ދެވަނަ ދައުރުގެ 117 ވަނަ އާންމު ބައްދަލުވުމުން ވަނީ ފާސްކޮށްފައެވެ. މިނިންމުން ވާނީ އާންމުކޮށް ހުރިހާ ރަށުކައުންސިލްތަކަށް ފޮނުވިފައެވެ. އަދި މިއިދާރާގެ ވެބްސައިޓްގަވެސް ޝާއިއު ކުރެވިފައެވެ. އެވޯޑާބެހޭ އިތުރު މައުލޫމާތު މިކައުންސިލްގެ ވެބްސައިޓް www.baa.gov.mv އިން ލިބެން ހުންނާނެއެވެ. އެވޯޑް ހަފްލާއަށް އާންމުގޮތެއްގައި ކުރެވުނު ހަރަދުތަކުގެ ތެރޭގައި 2014 އަދި 2015 ވަނައަހަރުގެ އެންމެ ހިދްމަތްތެރި ރަށުކައުންސިލަށް -/50000ރ (ފަންސާސްހާސް ރުފިޔާ) އަދި ދެވަނަ ކައުންސިލަށް -/30000ރ (ތިރީސްހާސް ރުފިޔާ) އަދި ތިންވަނަ ކައުންސިލަށް -/20000 (ވިހިހާސް ރުފިޔާ) އަދި އެންމެ ހިންގުންތެރި އަންހެނުންގެ ކޮމެޓީއަށް -/25000ރ (ފަންސަވީސްހާސް ރުފިޔާ) އިނާމެއްގެ ގޮތުގައި ޚަރަދުކުރެވިފައިވެއެވެ.
ޖަވާބުދެއްވީ: ބ. އަތޮޅު ކައުންސިލްގެ އިންފޮމޭޝަން އޮފިސަރ ޣައްސާމް މުހައްމަދު