މި މަހުގެ 25 ވަނަ ދުވަހުން ފެށިގެން ސްރީލަންކާއަށް ދަތުރުކުރާ މީހުން އިލެކްޓްރޯނިކް ޓްރެވަލް އޮތަރައިޒޭޝަން (އީޓީއޭ) ފުރަންޖެހޭނެ ކަމަށް އެ ގައުމުން ބުނެފި އެވެ.
އެ އުސޫލަކީ މިދިޔަ އަހަރުގެ ނޮވެމްބަރު މަހުން ފެށިގެން މެދުކަނޑާލާފައި އޮތް އުސޫލެކެވެ.
ރާއްޖޭގައި ހުންނަ ލަންކާ ހައި ކޮމިޝަނުން ބުނީ ޓޫރިޒަމްގެ ބޭނުމަށް އެގައުމަށް ޒިޔާރަތްކުރާ އެހެން ގައުމުތަކުގެ ރައްޔިތުން މިމަހުގެ 25 ވަނަ ދުވަހުން ފެށިގެން އީޓީއޭ ފުރަން ޖެހޭނެ ކަމަށެވެ.
ލަންކާއަށް ދަތުރަށް ފެށުމުގެ 24 ގަޑިއިރު ކުރިން ހޯދަންޖެހޭ މި ހުއްދައަށް އެދި ހުށަހަޅަންޖެހޭނީ eta.gov.lk ވެބްސައިޓުންނެވެ.
އީޓީއޭ ފުރަންޖެހޭ ގޮތަށް ހަމަޖެއްސި ނަމަވެސް ދިވެހިންނަށް އިތުރު ޗާޖަކާއި ނުލައި 90 ދުވަހުގެ ޓޫރިސްޓް ވިސާ އީޓީއޭ ސިސްޓަމުން ލިބޭނެ ކަމަށް ލަންކާ ހައިކޮމިޝަނުން ބުނެފައިވެ އެވެ.
